Rev. Mulinda n’omukyala bajaguzza emyaka 50 mu bufumbo Bp. Banja n’abatendereza

OMWAWULE eyawummula, Rev. William Sanga Mulinda ne mukyalawe Maama Norah Sanga Mulinda, bajaguzza emyaka 50 mu bufumbo. Omukolo gw’okwebaza ogwabadde ogw’ekitiibwa gwatandise n’okusaba okw’okussa ekimu, okwabadde mu Kkanisa ya St. James Church of Uganda Kavumba (esangibwa mu Wakiso Town Council, Wakiso district) ku Lwomukaaga nga January 24.

Okusaba kwakulembeddwa Omulabirizi w’e Namirembe, Rt. Rev. Moses Banja, ng’ali wamu ne Ssaabadinkoni w’e  Kavumba, Can. Fredrick Musisi. Omukolo gwetabiddwaako n’Omulabirizi w’e Mukono eyawummula, James William Ssebaggala, Omulabirizi w’e Namirembe eyawummula Wilberforce Kityo Luwalira, Omulabirizi w’e Mityana Dr. James Bukomeko, n’abaawule abalala.
Bwe yabadde abuulira, Omulabirizi Moses Banja yatenderezza Bamulinda olw’okutegeera obukulu n’ekitiibwa ky’obufumbo ne baagalana era ne babeeragana bulungi. Yabeebazizza olw’okuteeka mu nkola obweyamo bwe baakola nga bagattibwa,
bwe batyo ne bawa abafumbo abalala ekyokulabirako ekirungi.
Yabeebazizza okwagala Katonda n’okumusoosowaza mu bufumbo bwabwe.
Yawadde abafumbo amagezi okwagalana nga Kristo bwe yayagala ekkanisa, okusonyiwa n’okugumiikiriza. Yagambye nti obufumbo bwe bubeeramu okwagalana n’okwesiga Katonda, n’ebintu ebyandibadde ebizibu bifuuka byangu.
Abavubuka naddala abawala abaagala obufumbo, yabasabye baleme kupapa, nga beeraliikirira nti emyaka gibaweddeko, ekiyinza okubaleetera okufuna ababeezi ab’ebizibu. Yabasabye basooke kwetegereza mpisa z’oyo gwe baagala okufumbiriganwa naye, era basooke banoonyereze ne ku maka gy’ava, nga Bamulinda bwe baakola.
Rev. William Sanga Mulinda yeebazizza Katonda olw’okumuwa Maama Norah gwe yagambye nti mukyala mulungi nnyo, mugumiikiriza era mukozi. Yagambye nti mu bufumbo bwabwe Katonda abawadde ebirungi nfaafa era abayisizza mu bingi, nga kye baavudde basalawo okwebaza.
Yategeezezza nti olumu Maama Norah yafuna obulwadde obuzibu nga n’abasawo e India baali bakamutemye nti yali waakufa oba okufuna obulemu obw’olubeerera ku bwongo oluvannyuma lw’okulongoosebwa, kyokka Katonda yayamba n’awona bulungi,
ate ne basobola n’okufuna ssente z’eddwaaliro.

Yanokoddeyo n’emirundi ebiri gye yasimattuka okuttibwa Idi Amin, bwe yali akyakola mu Gavumenti e Ntebe, nga tannafuuka Mwawule. Katonda era yamwebazizza olw’ekirabo ky’okulokoka, n’ekirabo ky’abaana n’abazzukulu, n’emikwano emirungi. Abaana n’abazzukulu nabo baawadde obubaka, ne batendereza abajaguza olw’omukwano buli omu gw’alina eri munne. Baabeebazizza okubaagala, okubalabirira, okubasomesa n’okubatendeka empisa ennungi ez’obugunjufu. Bamulinda oluvannyuma baasembezza abagenyi baabwe ku kijjulo ekyabadde mu WAKISSHA Resource Center. Omuyimbi Mariam Ndagire y’omu ku baasanyusizza abagenyi.