Okufundikira omwaka omutukuvu tekitegeeza kuddirira mu kukkiriza-Ssaabasumba Ssemogerere

Nga December 24, 2024, Paapa Francis y’aggulawo omwaka gwa Klezia Omutukuvu ogwa Jubileewo, bweyaggulawo Omulyango Omutukuvu ogwa Klezia ya Petero Omutuukirivu e Roma. Y’alagira Abepiskoopi munsi yonna, nabo baggulewo Oluggi Olutukuvu olwa Lutikko yabwe ng’akabonero ak’okuggulawo omwaka guno. Kino baakikola nga December 29 (2024).

Bannaddiina nga batambula mu line

Mu Klezia Katolika Omwaka gwa Jubileewo gukuzjbwa buli luvannyuma lwa myaka 25. Okusinziira ku Fr. Dr. Ambrose Bwangatto, omwaka omutukuvu guba gwa kwezza bujja mukukkiriza. Abakristu bakubirizibwa okulamaga mu bifo eby’enkizo, okubonerera ebibi byabwe, ate Klezia ebawa Indulgensia ssinga balamaga era nebasembera ngabamaze okufuna Ssakramentu lya Penitensia.

Omwaka gwa Jubileewo (2025) Abepiskoopi baaguggalawo mumasaza gaabwe nga Desemba 28, 2025, ate Paapa Leo XIV nagufundikirira ddala ng’aggalawo Oluggi Olutukuvu olwa Klezia ya Petero Omutuukirivu e Roma nga January 6, 2026.

Kkwaaya ng'eyimba mmisa

Omwaka guno ngagukuzibwa, Abakristu mu ssaza ekkulu ery’e Kampala baakubirizibwa okulamaga mu bifo eby’atongozebwa Ssabasumba Paulo Ssemogerere, okuli Lutikko y’e Lubaga, Basilica y’e Munyonyo, Ekiggwa ky’Abajulizi e Namugongo, Ekiggwa kya Maria e Kiwamirembe, Lusinga Mitala-Maria gyebazaala Omujulizi Yozefu Mukasa Balikuddembe, ne Klezia ya Yoanna Batista e Nabulagala-Lubya, Abaminsane ababereberye ba White Fathers gyebaasomera mmisa embereberye mu Uganda nga June 25, 1879.

Fr. Bwangatto era y’ategeezezza nti Klezia y’akola entegeka Abakristu nebalamaga e Roma ne Luudi (mu Bufaransa), ne Medjugorje.

Ssaabasumba ng'akulembeddemu mmisa

Bweyali aggalawo omwaka gwa Jubileewo mu Lutikko e Lubaga (December 28, 2025), Ssabasumba Paulo Ssemogerere y’asabye Abakristu baleme kuddirira mukukkiriza kwabwe olw’okuba Omwaka gwa Jubileewo guggaddwawo, n’abakalaatira beeyongere bweyongezi okubugujja omuliro gw’okwagala Katonda, n’okukwata amateekaage.

“Mugende mumaaso n’okulamaga mubifo eby’enkizo mu kukkiriza kwaffe. Mwettanire Amasakramentu, naddala erya Penitensia ne Ukaristia. Mwagalane, Mubudeebude era muyambe abalwadde, abateesobola, abasibe, bamuzibe, n’abakadde,” Ssemogerere bweyategeezezza.