West Buganda baloze omukubiriza omukazi asoose

OBULABIRIZI bwa West Buganda bulonze omukubiriza w’Abakristaayo omukyala asoose mu byafaayo byabwo.
Muky. Victoria Grace Kazibwe, yalondeddwa ng’adda mu bigere bya Moses Nsereko Ssebuliba eyaweerezza ekisanja ekimu.
Olukiiko lw’Obulabirizi olwatudde ku kitebe e Kako lwakulembeddwa omulabirizi waabwo Rt. Rev. Gaster Nsereko ng’ayambibwako munnamateeka w’Obulabirizi buno, Stanley Kawalya.
Lwakulembeddwa okusaba kw’okussa ekimu Ekitukuvu nga Rev. Canon David Kaleebu omuwandiisi w’Obulabirizi bwa Central Buganda bwe yabadde abuulira yakuutidde bonna abaalondeddwa okutuukiriza obuvunaanyizibwa bwabwe wabula nga byonna bye bakola balina okukulembeza Katonda.
Okubuulira kwe yakusimbulizza mu Zabbuli 1:1-16 “Alina omukisa omuntu atatambulira mu kuteesa kw’ababi, Newakubadde okuyimirira mu kkubo ly’abo abalina ebibi, newakubadde okutuula mu ntebe z’abanyooma”
Yakuutidde abaalondeddwa okulaba nga bakola ebyo ebigenda okutwala Obulabirizi n’ekigambo kya Katonda mu maaso mu kifo ky’okubwawulamu.
Mu balala abaalondeddwa kwabaddeko Rev. Richard Kagimu nga kati ye Ssentebe w’ennyumba y’Abaawule (House of Clergy) ng’adda mu bigere bya Canon Amos Friday.
Olukiiko luno kuliko; Rev. Patrick Ssimbwa, Rev. Richards Kagimu (Ssentebe), Rev. Kasiita Mpuuga (Provost), Rev. Tabitha Ddembe ne Ven. Rev. Wasswa Christopher.
Waalondeddwaawo olukiiko lw’abantu 15 abagenda okulonda amannya agagenda okusunsulwamu abo abagenda okwesimba ku kifo ky’Omulabirizi ekiseera bwe kinaaba kituuse.
Olukiiko luno luliko abaawule bataano okuli; Rev. Patrick Ssimbwa, Rev. Kagimu Richard, Ven. Rev. Kasiita Mpuuga, Rev. Tabitha Ddembe ne Rev. Wasswa Christopher.
Mu batali baawule kuliko; Basaalidde Nelson, Lwasa Samuel-Misanvu, Ancilla Kavuma, Victoria Mayega, Samuel Bagombeka, Charles- Ssembabule,
Kibirige Abel- Kako ono nga w’abavubuka, Nakitende Joseline - Kifamba naye w’abavubuka ne Robina Ssali.