Abantu bana bafiiridde mu kabenje ku lwe Masaka

 

Okusinziira ku Twaha Kasirye omwogezi wa poliisi mu Masaka East, akabenje kano kaguddewo mu kiro ekikeesezza ku Lwokusatu e Matanga mu kitundu ekimanyiddwa nga Ndikuttamadda ku luguudo lwa Kampala-Masaka. 

 

Ategeezezza nti lukululana ekika kya Benz ebaddeko ennamba z'e Congo,CGO 9638AF/19 ebadde eva ku ludda lw'e Masaka ng'edda Kampala yeyingiridde loole Fuso namba UBQ 238D ebadde eyolekera mu bitundu by'e Mbarara. 

 

Obudde we bukeeredde nga loole y'ebyamaguzi ekyali mu kifo kino nga bannanyini maali bakyasitaana okugiggya mu byuma ebibadde byefunnyizza.

 

Kasirye ategeezezza nti era basitaanye okugya omulambo gw'omugoba wa lukululana Shanshuwa Kanyamunyu mu byuma mwe gubadde guwagamidde,n'egyabalala abasatu ababadde mu Fuso ababadde batanategerekeka mannya  nga n'atwaliddwa mu ddwaliro naye abadde tanazuuka bimukwatako wetukoledde eggulire lino.

 

Ayongeddeko nti byebakazuula biraga nti akabenje kano kavudde ku mugoba wa lukululana okuvugisa ekimama ng'agezaako okuyisiza ku lusozi awafunda nti kwe kwambalagana n'owa Fuso.

 

Asabye bekikwatako okutereeza mu kitundu kino wagambye nti walinga awafuuse akattiro era n'asaba abagoba b'ebidduka okusigala nga begendereza nti basobole okwewala embeera nga eno.

 

Abatuuze n'abatambuze abasangiddwa nga beetegereza awagudde akabenje kano nabo baliko bye boogedde wakati mu kulaajanira bekikwatako okugaziya ekitundu ky'oluguudo mu kifo kino.

 

 Emirambo gitwaliddwa mu ggwanika e Masaka okwekebejjebwa n'emmotoka zombi ziggyiddwawo ne zitwalibwa ku poliisi