Be baalagidde okulongoosa bazze mu kkubo kukuba ndongo!
Abavubuka bakoze efujjo ne bateeka emizindaalo mu kkubo ne bakoona endongo n'abalala ne bazannyira omupiira mu kkubo oluvannyuma lw’okulongoosa, ne batalaba mmotoka ziyoola kasasiro
Be baalagidde okulongoosa bazze mu kkubo kukuba ndongo!
GUNO gwe mulundi ogw’okubiri nga Bannayuganda bakola bulungi bwansi wabula abamu ku bavubuka bagufudde muzannyo abamu ne bateeka emizindaalo mu kkubo ne batandika okukoona dansi ate abalala ne bazannya mupiira
Bano Baasangiddwa Kabanyolo Ku Luguudo Oluva E Gayaza Okudda E Ziroobwe Nga Bakoona Dansi Wakati Mu Kkubo (2)
Ate yo ku mmayiro 8 ku luguudo lw’e Gayaza baabadde bazannyira omupiira wakati mu luguudo , ne Kagoma , Kawanda , Kawempe Ttula , Matugga nabo baakoze kye kimu.
E kawempe ttula bano baasazewo kwebaka.
Ku Lwomukaaga Bannayuganda bonna baabadde mu kuyonja nga teri kidduka kikkirizibwa kutambula okuggyako abo booka ab’enkizo enguudo zonna mmotoka zaabadde ntono okuggyako ezitambuza abalwadde , bannamawulire n’abeebyokwerinda.
Kino kyawadde abamu ku bavubuka omwagaanya okukola efujjo ne bazannyira omupiira mu nguudo ez’enjawulo n’abalala ne bafuna obutebe ne batuula wakati mu nguudo .
Abaserikale Nga Batadde Emisanvu E Kagoma Ku Luguudo Lw'e Bombo
Amaduuka gonna mu bitundu eby’enjawulo gaabadde masibe e Gayaza , Kasangati , e Kawempe , Mpereerwe , Kawanda , Kaleerwe , Bwaise , Matugga abantu bajjumbidde okulongoosa wabula obwedda bayomba nga bagamba nti mmotoka ezisomba kasasiro zaabadde tezirabikako nga n’okutuusa kati kasasiro akyali ku nguudo.