Pirates esoonye Kobs n'egitwalako ekikopo kya liigi ya Rugby
Kiraabu ya Kobs ekikopo kya liigi ya Nile Special kigiyise mu ngalo aba Pirates bwe bagikubidde ku butaka ku bugoba 23-07.
Omulangira David Wasajja ng'akwasa aba Piretes ekikopo kya liigi ya rugby eya Nile Special . Pirates ewangudde Kobs 23-07 May 11 2023. (Ekif: Silvano Kibuuka)
Rams 03 – 55 Heathens
Kobs 07 – 23 Pirates
Liigi egimazeeko n’obubonero 79 nga Heathens ekutte kyakuburi ku bunonero 77 ate Kobs n’edda mu kyokusatu bw’esigadde ku bunonero 75.
Oluzannya luno Kobs ne Piarates baalutandise benkanya obubonero 75-75 wabula Kobs n’eregeya ekisukkiridde n’ennyika abazannyi baayo emitima nga Pirates egitandikiddewo okugikozesa ebisobyo ekitundu ekisooka ne kiggwako nga bagimulembedde ku bugoba 9-0 nga bwonna buvudde mu peneti.
Omulangira David Wasajja ng'akwasa Ivan Magomu owa Piretes ekirabo ky'omuzannyi asinze nga Pirates ewangula Nile Special . Pirates ewangudde Kobs 23-07 May 11 2023. (Ekif: Silvano Kibuuka)
Buno buteebeddwa abazannyi Timothy Odongo ne Desire Ayera.
Wabula ng’ebula eddakiika ttaano, musaayimuto Karim Arinawe ateebedde Kobs n’efuna obugoba musanvu.
Obuwanguzi buwadde Pirates ekikopo kya liigi ekyokuburi bukya ebaawo ng’ekyasooka baakiwangula mu sizoni ya 2017/18.
Kapiteeni wa Pirates Isaac Massa ategeezezza nti bazze n’enjala y’okutwala ekikopo kya babadde bakolerera okumala ebbanga.
“Tuzze tumaliridde okuwagula. Obuvumu tubufunidde mu kuwangula mipiira gyaffe gyonna mu luzannya olwokubiri mu liigi. Kobs yatukubira ewaffe mu luzannya olusooka era tubadde tubakolerera,” Massa bw’ategeezezza.
Ye owa Kobs, Emmanuel Echodu ategeezezza nti bakkirizza nga Piretes ebasinzizza amaanyi.
Omupiira guno gubaliddwa n’Omulangira David Wassajja nga ye kalabaalaba w’ekibiina kya Uganda Rugby Union era nga yeetabye mu kukwasa abawanguzi ekikopo n’okubambaza emidaali.