Pogba alaalise okujulira ku kkoligo ery’emyaka 4

OMUWUWUTTANYI Omufransa Paul Pogba alemeddeko ku by’ekkoligo eryamuweze obutaddamu kuzannya mupiira okumala emyaka ena n’agamba nti waakujulira kubanga ye takozesanga ku biragalalagala bye bamulanga!

Pogba eyali omuzannyi wa Manchester United nga kati akubira mu Juventus ey’e Yitale, mu September wa 2023 yawerebwa okumala ekiseera ekitali kigere oluvannyuma lw’okumukebera abakugu ne basanga ng’omubiri gwe gulimu ebiralagalagala ebimwongera amaanyi ng’asamba omupiira.

Pogba bye yawandiise ku mukutu gwe ogwa Instagram

Ssinga ensala eno eyaweereddwa akakiiko akalwanyisa okukozesa ebiragalalagala mu mupiira e Yitale kisigalawo, kiba kitegeeza nti Pogba si wa kukoona ku mupiira okutuusa mu 2027, nga mu kiseera ekyo ajja kuba ku myaka 33.

Pogba ng’asinziira ku mukutu gwe ogwa Instagram agambye nti mwennyamivu okuba nti takozesanga ku biragalalagala, wabula abantu abamutigomya beeyambisizza ensonga eno okusaanyaawo ebirungi byonna by’akoze mu mupiira.

N’alaalika nti ng’ensonga ze agenda kuzongerayo mu kkooti etaawulula enkaayana z’ebyemizannyo mu nsi yonna (Court of abitration for Sport) ajulire, era n’alabula nti nga ziwedde ajja “kulabisa” bonna abamutigomya."