Uganda Ewangudde Zaabu mu mpaka za Chess e Zimbabwe

Gold
Sana Omprakash (U18)

Silver 
Juliet Asaba (U14)
Apollo Ahumuza (U12)

Bronze
Suhana Anil (U12)
Elvis Tumusiime (U10)
Soubith Omprakash (U16)

Musaayimuto Sana Kayyar Omprakash ayingidde ebyafaayo nga munnayuganda asoose okuwangula omudaali gwa zaabu mu mpaka zabamusaayimuto eza Africa Youth Chess Championship, ezaakomekerezeddwa mu kibuga Harare ekya Zimbabwe. 

Sana yabadde avuganya mu mutendera gwabali wansi wemyaka 18 omwabadde bakafulu ba Chess ku lukalu lwa Africa omuli omu Nigeria Deborah Ebimobo, gweyeekubidde mu round eyomukaaga eyabadde eya vaawo mpitewo. 

Bamusaayimuto nga bakutte emidaali gyebaawangudde, ku kkono ye Emanuel Mwaka president wa UCF, ku ddyo ye Patrick Ojok eyakulemberamu ekibinja

Yalangiriddwa ku buwanguzi oluvannyuma lwokugwa amaliri nemunnansi wa Lesotho Ntsieho Bonelo mu lawundi eyasembyeyobwatyo namalako empaka nga takubiddwamu nga awangudde enzannya musanvu nakola amaliri emirundi ebiri ngayakungaanyizza obubonero 8 okuva mu nzannya mwenda.

Obuwanguzi buno bwawadde Sana ekitiibwa ekya Woman International Master (WIM) nafuuka omuwala asoose okukituukako mu East Africa. Sana era yasiimiddwa naweebwa ekirabo ekyomuzanyo eyasinze okwolesa omuzannyo omuyonjo kiyite Fair Play Award olwokulaga omutima ogwebyemizannyo, okussa ekitiibwa mu banne nokuzannya mu ngeri eya kisajja kikulu.

“Ndi musanyufu olwokufuuka munnayuganda asoose okuleeta omudaali gwa zaabu mu mpaka zino eza AYCC. Empaka zaabadde nkalubo naye olwamaanyi ga mukama nasobodde okutuuka ku buwanguzi”. Kati Sana atunuulidde ngule ya Woman Grandmaster (WGM) gyasuubira okulwanirira omwaka ogujja.

Sana omprakash nga akutte omudaali gwa zaabu nengule eyamuweereddwa

Uganda yeerisizza nkuuli ku lunaku olusembayo bweyawangudde emidaali emirala etaano okuli egya silver ebiri negyekikomo esatu nemalako nomugatte gwa midaali mukaaga. Juliet Asaba (U14) ne Apollo Ahumuza (U12) beebawangulidde Uganda emidaali egya Silver oluvannyuma lwoluwangula enzannya zaabwe zaabwe ezaasembyeyo.

Emidaali egyekikomo gyawanguddwa Suhana Anil Yadav (U12), Soubith Omprakash (U16) ne Elvis Tumusiime (U10), eyawangudde emizannyo gye etaano egyomuddiringanwa egyasembyeyo. 

Kenya yeyawangudde empaka zomulundi guno ezaabadde ezomulundi ogwe 16 oluvannyuma lwokukunganya omugatte gwa midaali 10 okuli zaabu (4), silver (2) ne bronze (4) nebaddirirwa Algeria nemidaali esatu okuli zaabu ebiri ne silver gumu . Uganda yakutte kyakusatu nga yamalidde waggulu wamawanga agaamaanyi nga South Africa, Egypt, and Nigeria.

Sana nga yaakakwasibwa engule nomudaali, ku kkono ye Emanuel Mwaka President wa UCF

Eyakulemeberamu ekibinja kya Uganda Patrick Ojok yatenderezza omutindo ogwassiddwawo bamusaayimuto bano gweyagambye nti gulaga nga Uganda bweaajjakudde mu muzannyo gwa chess ku lukalu lwa Africa. Wabula kino Ojok yakitaddw ku nteekateeka gyebaakola emyaka etaano egiyise eyokuzuula nokuzimba ebitonw byabavubuka nga bayambibwa akakiiko akalondoola ebibiina ebiddukanya emizannyo mu ggwanga aka National Council of Sports.