Murwanirire puroguraamu za gavumenti- Minisita Musasizi ashabire abeebembezi- Rubanda.

N’ebya Job Namanya

RUBANDA

Minisita w’eihanga ow’eby’esente, Henry Ariganyira Musasizi ashabire abeebembezi omu disiturikiti eya Rubanda kufayo munonga bakareeba ngu puroguraamu za gavumenti zahikirira kuhwera abatuura kuruga omu bworo. 

Musasizi naagira ngu abeebembezi ahandengo zoona bashemerire kureeba ngu gavumenti yahikirirza ekigyendererwa kyayo aha banya-Uganda.

Minisita Musasizi agambire ebi obu abaire nabuganaho abeebembezi b’ebyaro kuruga omu muruka ogwa Igomanda omu gomborora ya Hamurwa omu rukiiko orubaire aha kishaayi ky’omuruka gwa Kakore Rugambwa.

Musasizi naagira ngu puroguraamu ya Parish Development Model, Emyooga, Youth Livelihood Fund, n’ezindi zikareetwa kuhwera abanya-Uganda kandi abeebembezi baine kuzimanyisa abantu n’okuzigambaho gye.

Omu rukiiko nirwo rumwe- Steven Kasyaba, Ceeyamaani wa disiturikiti ya Rubanda ashabire abeebembezi b’ebyaro kufayo munonga bakataho entuura nungi omu bantu abu barikwebembera obwo barikwejunisa ebiragiro ebyabahairwe.

Bwanyima y’orukiiko oru, Musasizi ayebeembire omurimo gw’okwiguraho sitoowa y’abahingi emazireho shiringi miriyooni 170 omuri Karukara omu tauni kanso ya Hamurwa. 

Sitoowa egi ekombekwa ahansi y’enteebekanisa eya Agriculture Cluster Development Project (ACDP) project eya Banka y’ensi yoona egyenderiire kuhwera kutunguura okuhinga n’okushuubura emisharuuro erimu; omuceeri, ebihimba, ebicoori, muhogo, omwani n’endiijo omu eihanga.

Ekibiina ekya Rwara Kweyamba kikatunga esente ezirikwingana miriyooni 114 kuruga omu gavumenti kandi abahingi bakataaho shiringi miriyooni 56 kureeba ngu sitoowa egi yayombekwa.

Dr. Narcis Kabateraine, omwe aha batandikireho ekibiina eki naagira ngu baine amatsiko mingi omu kibiina eki. 

Entebeekanisa eya Agriculture Cluster Development Project (ACDP) obwa hati eri omuri za disiturikiti 57 omu Uganda.

#WestUpdates