Akakiiko k’eby’oburuuru kataho ekiro ky’okugarukamu aka Dokolo.

N’ebya Joseph Ekol

DOKOLO

Okugarukamu kuteera akaruuru k’okutoorana omuny’ishengyero-kazi wa Dokolo nikwija kubaho ebiro 21/03/2024, Okurugiirira aha byarangiirirwa akakiiko k’eby’oburuuru.

Eriizooba Orw’okubanza ebiro 12/02/2024, akakiiko k’eby’oburuuruu kagiraho orukiiko rw’abarikukwatwaho omu disiturikiti ya Dokolo kwetegurira akaruuru k’okugarukamu omuny’ishengyero-kazi hamwe n’oburuuru bw’okwijuza entebe ezindi zirimu busha omu disiturikiti egi.

Entebe y’omuny’ishengyero-kazi wa Dokolo ekasigaramu busha bwanyima y’okufa kw’owabaire agirimu Cecilia Barbra Atim Ogwal owafiire ebiro 18/01/2024.

Orukiiko oru orubaire ah’eishomero erya Dokolo Technical School rwayetabwamu abajwekyerwa b’ebigombe by’obutegyeki, ba memba b’ebitongore ebitari bya gavumenti, bakuru b’entebe z’ebyaro, ab’eby’okwerinda, abanyadiini, abeebembezi b’eby’obuhangwa n’abantu aborekire ekiteekateeko ky’okwesimba omu karuuru aka kuza omu bigyere bya Cecilia Ogwal n’entebe ezindi.

Ceeyamaani w’akakiiko k’eby’oburuuru, Justice Simon Byabakama Mugenyi naagira ngu nabwo nibeija kuteeza oburuuru obundi kwijuza entebe ezindi ezirimu busha omu disiturikiti eya Dokolo.

Nashaba abateezi b’akaruuru okukwatanisa n’akakiiko kubaasa kuteebekanisa akaruuru k’amaziima n’oburinganiza.

Okushwijuma za regista z’abateezi b’akaruuru nikwija kutandika ebiro 15/02/2024.

Okuhandiika abarikwenda kwesimba nikwija kubaho ebiro 11/03 kuhisya ebiro 12/03/2024 aha ofiisi z’orikukurira eby’okuteeza akaruuru omu disiturikiti ya Dokolo.

Okurugiirira ahari Byabakama, abararabeho kwesimba nibeija kutandika kuronda akaruuru kuruga ebiro 13/03 kuhisya ebiro 19/03/2024.

Byabakama naashaba abetsimbireho kuronda akaruuru kaabo omu busingye kandi berinde okureetaho akavuyo.

Okuteera akaruuru nikwija kutandiika n’akaba kansara ebiro 18/03/2024.

Akaruuru k’omuny’ishengyero-kazi wa Dokolo nikeija kuteerwa ebiro 21/03/2024.

Byabakama nashaba ebigombe by’obutegyeki okuhabura abashagiki baabo obutareetaho akavuyo koona.

#WestUpdates