NRM etooraine Adongo nk'omukwasi w’ebendera omu ka Dokolo.

N’ebya Patrick Okino

DOKOLO

Ekigombe ekiri omu bwebembezi ekya NRM kitooraine omukwasi wakyo w’ebendera omu karuuru k’okugarukamu kutoorana omuny’ishengyero-kazi wa disiturikiti eya Dokolo.

Tiimu y’abakuru eyebembiirwe orikukurira eby’okukunga abantu omu NRM, Rosemary Sseninde baanjwire Adongo Elau nk’omukwasi w’ebendera aharwamukaaga ebiro 17/02/2024 omu rukiiko orubaire aha muruka gwa Dokolo omu tauni kanso ya Dokolo.

Abantu 2 abandi aba NRM ababaire baayorekire ekiteekateeko ky’okwesimba barugiire omu karuuru aka kushagika Adongo owayetsimbireho omu karuuru ka 2021 ahi yaasingirwe omugyenzi Cecilia Barbra Atim Ogwal.

Beitu hoona, abandi bantu 4 bagumire omu karuuru n’obu ebikongi by’amaani omu kigombe kya NRM babashabire kuruga omu karuuru bakaza enyima ya Adongo bakamurondera akaruuru.

Entebe y’omuny’ishengyero-kazi wa Dokolo ekasigaramu busha bwanyima y’okufa kw’owabaire agirimu Cecilia Ogwal aha biro 18/01/2024. 

Ogwal akaitwa endwara y’ekookoro ah’eirwariro omuri India kandi akaziikwa omu tauni kanso ya Alito omu disiturikiti eya Kole aha biro 27/01/2024.

Akakiiko k’eby’oburuuru kakataho ekiro ky’ebiro 21/03/2024 nk’ekiro ky’okuteereraho akaruuru aka.

Abantu 11 nibo borekire ekiteekateeko ky’okwesimba omu karuuru aka kandi aba barimu Adongo Elau owa NRM, Sarah Aguti Nyangkori owa UPC, Dr. Rosemary Alwoc Ogwal owa FDC kandi muhara w’omugyenzi Cecilia Ogwal hamwe na Irene Amongi Ajwika.

Abandi ni; Dr. Grace Lalam Anna Atine, Rebecca Arao, Abang Beatrice, Dr.Esther Akullo, Christine Acen, Eunice Ayugi na Harriet Ageno owa NUP.

Abang nabwo ori ceeyamaani w’ekigombe kya NRM ahabwa disiturikiti eya Dokolo oyetsimbireho nk’otiine kigombe ayangire okushaba kuruga omu karuuru aka na bataahi be abarimu; Ajwika, Arao na Dr. Lalam.

Sseninde abahabwire okuteekateeka ahansharamu yaabo y’okwesimba nkabatiine bigombe n’obu ekigombe kitarikubazibira kwesimba beitu tikirikwikiriza ba memba abaine emicwe mibi.

#WestUpdates