Omusinga Mumbere asiimire Purezidenti ahabw’okutambira amagara ge.

N’ebya Omushaki weitu

KASESE

Omusinga wa Rwenzururu, Charles Wesley Mumbere asiimire Purezidenti Yoweri Museveni ahabw’okutambira amagara ge omu kurwana okwabaireho omu mwaka gwa 2016 ahagati y’abakumi b’obusinga hamwe n’ab’eby’okwerinda okwarugiiriremu okufa kw’abantu 103.

Omusinga ahaireyo okusiima kwe obu abaire ataayaayire abajwekyerwa ba NRM ahabwa Kasese Munisiparite ababaire beebembiirwe omuny’ishengyero owa Kasese, Ferigo Kambale aha kikaari kye ahi arikukorera emirimo ye hati omu kyaro ekya Kamaiba omuri Kasese Munisiparite.

Mumbere agambiire abagyenyi be ngu Purezidenti akaragiira Maj.Gen.Peter Elwelu obwire obwo owaduumiire amahe ga gavumenti okumwiha omu kikaari kye ahuriire.

Omusinga ayongiire yaagira ngu Purezidenti tarakomire aha kutambira amagara ge kyonka beitu akagumizamu yamwihaho emishango yoona ei kooti yabaire emuteirweho n’abakumi b’obusinga barikurenga 200 kandi obwo babaire nibabaasa kuheebwa ekifubo ky’amaani nk’eky’okwitwa.

Mumbere naagira ngu okurwana okwabaireho 2016 kukaba kubi munonga kandi kukaretaho omwirima omu businga ahabw’okuba abantu baingi bakasheesha eshagama.

Omusinga hamwe n’abagyenyi be bagambire n’ahantunguuka ya Kasese barikugira ngu ekyanga eki kirimu eby’obugaiga bwingi ebishemeriire kukoresibwa gye ahabw’oburungi bwa Kasese.

#WestUpdates