Omukazi yandizimbye enju nga tabuulidde bba?

KU mulembe guno ng’abakyala bangi abakeera okunoonya ensimbi, bangi batuuse ku ssa ly’okubaako bye beekolera ng’abakyala. Ate abamu ssente ze bakozesa ebintu bino bazifissa ku z’akameeza abasajja ze babalekera okulabirira awaka.

Abakyala abamu baguze poloti n’okuzimbamu emizigo mu ssente zaabwe ze bayita ‘ez’ekikazi’. Wabula oluusi abakazi kino baki­kola ng’abaami baabwe tebam­anyi. Waliwo abazimba ewaabwe gye babazaala, ng’asangiddwa baamuwaayo ekibanja oba ettaka n’azimba okwo naye nga taata w’abaana tamanyi.

Waliwo omusajja gwe banyumyaako eyapangisanga ennyumba ya mukyala we, naye nga tamanyi nti maama w’abaana ate ye landiroodi!

Abakyala bakola kino abamu bagamba nti, ssinga omusajja amanya nti olina ku kasente era n’otandika n’okuzimba olwo ng’obuvunaanyizibwa abweggya­ko ng’abukulekera.

Mwajjuma Nassali W’e Kyengera;

Abamu bw’amanya nti olinayo emizigo gy’osolooza, olwo ng’eby­okugula ebikozesebwa awaka abivaako, kubanga abeera amanyi nti olina ssente.

Waliwo n’abasajja abatuuka okusala olukwesikwesi okukka­kkana ng’omukazi ennyumba gye yazimba agitunze, ate oluusi ssente zonna omusajja n’azitwala ng’amulimbyerimbye.

Naye ate waliwo abasajja abaagaliza bakyala baabwe era nga bw’amugamba nti alina w’aya­gala okuzimba, asobola n’okum­wongerezaako ku ssente, naye abakyala abasinga baagala nnyo okukola ebintu nga bino mu nku­kutu. Wano we tuggye ekibuuzo kyaffe ekyaleero nga tubuuza nti; Omukyala yandizimbye ennyum­ba ng’omwami we takimanyiiko.

Ali Kigongo Ow'e Bombo

ALI KIGONGO w’e Bbombo; Nze omukyala owange buli kyenkola akimanyiiko kati ye bw’azimba ennyumba nga simanyi kitegeeza abeera tanneesiga era we nkimanyira tubeera tugenda kuvaawo bubi nnyo ddala.

MWAJJUMA NASSALI w’e Kyengera; Kisinziira enkwatagana yammwe n’omwami wo bw’olaba ng’omutima gwe bw’onoomugamba nti ozimba teguuzimbe mugambe ayinza n’okukwasizaako.Naye bw’olaba ng’omutima gwe munafu zimba nga tomugambye okwewala entalo olw’ennyumba gye weezimbira.

Shamim Nakato e Lweza; Kituufu omukazi okuzimba ennyumba nga tabulidde ku bba. Abasajja b’ennaku zino balina ensaalwa ku bakazi baabwe naddala bw’alaba ng’alina ke yeekoledde. Oluusi bw’omugamba, obutabankuguko we buva, amaka ne gataddamu kutereera. Azimbye nga tamugambye asinga, okwewala endooliito.