Bujjingo aliisizza abagoberezi be ekigambo kya Mukama okumala essaawa 2 n’ebiwundu by’amasasi mu mugongo!

PAASITA Aloysius Bujjingo 52, eyasimattuse amasasi agasse omuyambi we, yeewuunyisizza abagoberezi be bwe yalinnye akatuuti ku Ssande n’amala essaawa bbiri nnambirira ng’abaliisa ekigambo kya Mukama n’ebiwundu by’amasasi by’agamba nti biri mu mugongo!

Bujjingo yalinnye ku kituuti mu kkanisa ye eya House of Prayer Ministries International (HPM) ku ssaawa 6:00 ez’omu ttuntu n’asooka amala eddakiika eziwera ng’ayimiridde tavaamu kigambo oluvannyuma n’alyoka asumulukuka n’atandika okwogera.

Col. Mwesigye Ng'ayogera Ku Byokwerinda Bya Bugingo N'ekkanisa

Bakira ekigambo akiriisa bw’awuuba emikono n’okwetala ku katuuti ekyalese abagoberezi be nga beewuunya amaanyi ‘Musajja wa Katonda’ ge yabadde nago okutambula n’ebisago by’amasasi agaamukubiddwa mu kiro kyOlwokubiri nga January 3, 2024.

Yayogeredde essaawa 2 era ng’anaatera okumaliriza, n’akyuka n’akuba abagoberezi be omugongo n’abagamba nti,

“omugongo ogwo mugulaba amasasi we gaakubye era abasawo bankolako, buli ekinkolebwako abasawo bakikwata ku butambi, era baakubiraga eggwanga nga mmaze okuwona”.

Wano yanyumizza engeri Muhumuza gye yamuteereddewo omubiri, amasasi gonna agandikubye ye ne gakuba Muhumuza, agamu ne gamuyitamu ne gamukuba (ye Bujjingo) kyokka olw’ekisa kya Mukama tegaayingidde wala nnyo.

Bugingo N'abamu Ku Bamulekwa B'omugenzi.

Amagye geddizza ebyokwerinda bya Bujjingo

Mu kusaba kw’eggulo ku Ssande, lwe kyategeerekese nti amagye ga UPDF gaabadde geddiza ebyokwerinda bya Paasita Bujjingo era kati amagye ge gali mu mitambo gy’ebyokwerinda ku kkanisa ya Bugingo, mu maka ge n’awali bizinensi ze endala.

UPDF yasindise musajja waayo Col. Fred Mwesigye, akulira ebikwekweto mu Kampala n’emiriraano, ku kkanisa ya House of Prayer okulaba ng’aanyweza ebyokwerinda, era yasinzidde mu kusaba eggulo, n’agumya Bujjingo n’abagoberezi be nti amaze okuteeka basajja be abatendeke obulungi mu buli kifo Bugingo ky’alinako akakwate, era ebyokwerinda biri ggulu ggulu.

Mwesigye yasabye abantu okukomya okwogera ku bye batamanyi nga bwe bakoze okuva Bujjingo lwe yakubwa amasasi, nga buli alina essimu yeefudde omukugu mu kutagulula ensonga z’obulumbaganyi obulimu emmundu, kyagamba nti kiwadde omwaganya amawulire ag’obulimba okusaasaana ennyo.

Abajaasi abaalabiddwaako nga bakuuma e Canan baabadde bakutte emmundu zi lwasamayinja, nga ne ffeesi bazitaddeko obukookolo.

Bujjingo wakati mu saavisi, yafukamidde n’abagoberezi be ne bafukamira olwo abamu ne batandika okukukukusa amaziga. Omusumba naye yatendewaliddwa n’atema omulanga ogw’omwanguka nti “Richard sijja kukuswaza.”

Ekyaddiridde, ekkanisa yonna yabadde ng’esaanuddwa buli muntu amaziga ne gatandika okumuttulukuka.

Omusumba bwe yatandise okwogera, yakkaatirizza nti olw’obuzira bwa Muhumuza, ekimu ku bisenge ebigenda okubeera ku Kkanisa y’ebirooto emanyiddwa nga Pentagon gy’agenda okuzimba, kyakumubbulwamu okumujjukira.