Nkuba Kyeyo avudde e South Africa n'afuumuula nnyina mu nnyumbva kitaabwe gyeyabalekera

Omusika oluvudde e South Africa n'alagira nnyina ayamuke amaka adde gye bamuzaala kubanga kitaawe yagamulaamira.

 

Nnamwandu yekubidde enduulu mu b'obuyinza bamuyambe ku mutabani we gweyezaalira era omusika wa bba nti eyamulagidde okwamuka amaka adde ewabwe kitaabwe gyayamujja.

 

Masitulla Nansamba yeyekubidde enduulu olwa mutabani we Hakimu Mbaziira okumubonyabonya n'okumukugira okukozesa ebintu bba byeyamulekamu.

 

Bano batuuze b'e Ntenjeru B mu Kayunga town council mu disitulikiti y'e Kayunga era omukadde Nansamba ensonga yaziroopye ewa Collins Kafeero akulira eby'eddembe ly'obuntu, amaka n'abaana era naye yagenze n'atuuza aba famire okutereeza ensonga.

 

Aba famire bubeefuse ne bbulooka Kasumba Twahiri gwebalumiriza okuwaga omusika n'atulugunya nnyina era nti lumu baapanga okuwa omukadde obutwa bamutte.

Nnamwandu agamba nti mutabani we yamugaanyi okukwata ku kintu kyonna omuli okunoga emwanyi era nga n'okusima emmere ateekeddwa kusooka kumusaba lukusa.

 

Nnamwandu agamba nti omusika mutabani we olwavudde e South Africa gyeyali agenze okupakasa ne bimulema yakwatagana ne Babbulooka ne batunda ettaka nga kati akatundu akasigadde kekalimu ekiggya n'enyumba nawo amugobawo abitunde.

 

Omusika agambye nti tezaali mbiro okufuna obusika era naye yalabira awo nga alidde obusika n'amaka bagamuwadde era yaleese n'ekiwandiiko omugenzi mweyamuweera obusika kyokka aba famire kino baakiwakanyizza nga bagamba nti kijingirire.

 

Nansamba nga ye nnmwandu wa Hajj Rajab Gulamuseeni Tamuzadde, agambye nti yegayiridde mutabani we amulekereko ku mwanyi ezaamumenya okusimba era n'amubalira ebikolo munaana wabula nti omukadde bw'afa nga biddira omusika.

 

Collins Kafeero ow'eddembe ly'obuntu, amaka n'abaana asazizzaamu eby'okutunda era nti bbonna baagula mpewo n'alagira omukadde yegazanyize mu maka n'emwanyi azinoge.

 

Abasomesezza ku ngabanya y'ebintu by'abafu nti buli muntu afuna kyenkanyi oluvanyuma lw'okufuna obuyinza okuva ew'akulira ebintu by'abafu "Administrator general"

 

Kafeero abajjukiza nti engeri z'okufuna ebyobugagga ziri ssatu nga ekisinga obukulu kukola nnyo era ekyo ky'ofunye ku busika ebeera ntandikwa.