Kanso ya Ntungamo kwinamira ba kansara.

Kanso ya Ntungamo kwinamira ba kansara.

N’ebya Fred Turyakira

Kanso ya disiturikiti ya Ntungamo neija kugiraho okushutama kw’omutaano aharwakashatu, 20/9/2023 kubaasa kwinamira ba kansara babiri abafeereire omubutandu ya motoka nyomwabazyo.

Pius Nuwagaba Tusimire, 32, obaire ari kansara w’entebe yakataano ahabw’egomborora ya Nyarutuuntu na Monica Kutamba Rutabingwa, 29, kansara w’egomborora ya Ngoma bafeereire omuri butandu ahari Katinda ahanguuto eya Ntungamo-Kabale.

Ababiri babaire nibaza Rubare obu emotoka yaabo etomereine buso-bwa-ntaama na rukururana namba UBD 660 eya kampuni ya Nile Agro Industries.

Okucondooza okwakozirweho nikworeka ngu Nuwagaba obaire navuga omunjura y’amaani agyerizeho kwemerera beitu ku areebire rukurirana erikwija, agyerizeho kuza orubaju orundi nikwo kutomerana nayo, bombi ababire bari omumotoka bafeereireho.

Nicholas Twikirize Mugyenyi, Sipiika wa disiturikiti ya Ntungamo yaagira ngu kanso neija kugiraho okushutama kw’omutaano okurikwija kutandika shaaha 3 z’akasheeshe kuhisya shaaha 6 z’eihangwe.

Nuwagaba naziikwa aharwakashatu nyencakare omumakagye Omurukindo, omuruka gwa Nyaburiza omugomborora ya Nyarutuuntu. Ogu asigireho omukazi n’abaana babiri.

Kutamba, osigireho abaana bashatu naija kuziikwa omumaka g’iba omugomborora ya Ngoma aharwakana.

Twikirize yaabagambaho nk’abakozi ababaire ababaire bari eky’okureeberaho kandi barikukwatanisa na batahi baabo.

Samuel Muchunguzi Rwakigoba, Ceeyamaani wa disiturikiti ya Ntungamo yaagira ngu disiturikiti efeereirwe abantu b’amaani ababaire nibarwanisa obushomankuzi kandi okufa kwabo kwasigaho ekiina omubwebembezi.

#WestUpdates