Okwinamira emibiri yaba kansara 2 abafeereire omuri butandu

Okwinamira emibiri yaba kansara 2 abafeereire omuri butandu

N’ebya Ali Wasswa

Ntungamo:

Haabaho okwinamira n’okushabira ba kansara babiri aba disiturikiti ya Ntungamo abafeereire omuri butandu yamatoka ahanguuto eya Ntungamo-Kabale.

Pius Nuwagaba Tusimire, 32, obaire ari kansara w’entebe yakataano ahabw’egomborora ya Nyarutuuntu na Monica Kutamba Rutabingwa, 29, kansara w’egomborora ya Ngoma bafeereire omuri butandu ahari Katinda aharwokubanza.

Haabaho okwinamira n'okushabira emibiri yaba kansara 2 ba Ntungamo abafeereire omuri butandu..(Photo by Ali Wasswa)

Ababiri babaire nibaza Rubare obu emotoka yaabo etomereine buso-bwa-ntaama na rukururana namba UBD 660 eya kampuni ya Nile Agro Industries.

Haabaho okwinamira n'okushabira emibiri yaba kansara 2 ba Ntungamo abafeereire omuri butandu..(Photo by Ali Wasswa)

Okucondooza okwakozirweho nikworeka ngu Nuwagaba obaire navuga omunjura y’amaani agyerizeho kwemerera beitu ku areebire rukurirana erikwija, agyerizeho kuza orubaju orundi nikwo kutomerana nayo, bombi ababire bari omumotoka bafeereireho.

Nicholas Twikirize Mugyenyi, Sipiika wa disiturikiti ya Ntungamo naagira ngu kanso neija kugiraho okushutama kw’omutaano okurikwija kutandika shaaha 3 z’akasheeshe kuhisya shaaha 6 z’eihangwe.

Nuwagaba naziikwa eriizooba omumakagye Omurukindo, omuruka gwa Nyaburiza omugomborora ya Nyarutuuntu. Ogu asigireho omukazi n’abaana babiri.

Kutamba, osigireho abaana bashatu naija kuziikwa omumaka g’iba omugomborora ya Ngoma nyencakare aharwakana.

Haabaho okwinamira n'okushabira emibiri yaba kansara 2 ba Ntungamo abafeereire omuri butandu..(Photo by Ali Wasswa)

Twikirize abagambireho nk’abakozi ababaire ababaire bari eky’okureeberaho kandi barikukwatanisa na batahi baabo.

Samuel Muchunguzi Rwakigoba, Ceeyamaani wa disiturikiti ya Ntungamo naagira ngu disiturikiti efeereirwe abantu b’amaani ababaire nibarwanisa obushomankuzi kandi okufa kwabo kwasigaho ekiina omubwebembezi.

#WestUpdates