Aba P.7 nibatandika ebigyezo byabo Orwakabiri na ‘briefying’- UNEB

N’ebya Simon Masaba
 
Ekitongore ky’ebigyezo omu eihanga erya Uganda National Examinations Board (UNEB) kiri omu nteebekanisa ez’ahamuheru ahabw’abeegi ba P.7 kutandika kukora ebigyezo byabo by’aha muheru.

Omugambirizi w’ekitongore ky’ebigyezo ekya UNEB, Jennifer Kalule naagira ngu enteebekanisa ziriyo nizigyenda omu maisho ez’okureeba ngu abeegi ba P.7 bakora gye ebi.

Kalule nashoborora ngu okuteebekanisa abeegi n’okubagambira oku baine kutwazamu baaba nibakora ebigyezo byabo ‘briefying’ kuriho nyencakare Orwakabiri ebiro 07/11/2023.

Naagira ngu abeegi nibeija kutandika kukora ebigyezo byabo Orwakashatu ebiro 08/11 n’ebiro 09/11/2023.

Ebigyezo ebya S.6 nibyija kutandika orwakataano ebiro 10/11/2023 na briefying y’abeegi okurugiirira aha kitongore ky’ebigyezo ekya UNEB.

"Abeegi ba P.7 abarikwingana 749,347 nibo bayehandikiise kukora ebigyezo kandi obucweka 48 ahari 100 n’aboojo reero abaishiki n’obucweka 52 ahari 100.  Emyanya y’okukoreramu ebigyezo bya P.7 omu eihanga ryoona neyingana 14,442 kandi obucweka 79 ahari 100 n’amashomero aga gavumenti reero obucweka 21 ahari 100 n’amashomero ag’abantu buntu,” Kalule arikushoborora.

Kalule naagira ngu ekitongore kya UNEB nikisiima abashomesa ahabw’okwehayo n’okushomesa abeegi na munonga ab’omu mashomero aga gavumenti.

Naagira ngu omu kukora ebigyezo bya S.4, habairemu emishango y’okwiba ebigyezo beitu yahamya ngu tihaine kigyezo kyoona ekya P.7 ekyashohoziibwe.

#WestUpdates