Ebirarugye omu kukyebera ebya P.7 kushohozibwa omu wiiki ya kashatu, 2024.

N’ebya Simon Masaba

KAMPALA

Obwo abeegi ba S.6 barikuhendera okukora ebigyezo byabo Orwakataano ebiro 01/12/2023, ekitongore ky’ebigyezo ekya UNEB kyatandika ekicweka ky’okukyebera empapura z’ebigyezo by’abeegi ba P.7 na S.4.

Abashomesa barikurenga 14,000 nibo batoorainwe kukyebera ebigyezo ebi omu mwanya 33 ey’okukyebereramu ebigyezo.

Omu kugambaho n’abanyamakuru eriizooba aha kitebe kikuru kya UNEB, Jennifer Kalule Musamba, Omugambirizi w’ekitongore ekya UNEB yaagamba aha ku okukora ebigyezo kugyenziiremu nikwo kwebaza ababaire nibakuuma ebigyezo ebi omu mashomero gatari gamwe, ab’eby’okwerinda, ekitongore ky’oburamuzi hamwe n’abanyamakuru ahabw’omurimo ogu bakozire.

Nagira ngu okukyebera ebigyezo n’ekicweka ekindi omuri omushwijuma empapura z’abeegi aha rurengo rwa P.7 na S.4. Empapura ezi zaheerize kushwijumwa kandi zayoheerezibwa omu myanya 13 kukyebereramu ebya P.7 kandi ebya S.4 na S.6 nibeija kukyebererwa omu myanya 20.

Wiiki ehwaire ebairemu ebizibu bitari bimwe ahi amakuru g’okuhabya abantu gaajaanjire aha mikura ya kanyabwengye ngu ekigyezo ekya Physics eky’abeegi ba S.4 kikaba kirimu enshobi. Ekitongore ekya UNEB kirugireyo kyahakanisa amakuru aga kirikugira ngu empapura zoona ez’ebigyezo zikashwijumwa kurungi kandi tihaine ebaire erimu enshobi.

Ekitongore ekya UNEB nikirabura amashomero n’abeegi obuteikiririza omu bishuba nikwo kugira ngu haabaho amakuru agu ekitongore kirikwenda kushohoza nikikoresa emihanda ehikire beitu hatari aha ‘social media’.

Obwo okukyebera empapura z’ebigyezo by’abeegi, UNEB neegira ngu eriyo nekorera hamwe n’ekitongore kya Pooriisi kubaasa kucondooza n’okumanya ahi amakuru g’okuhabya abantu garugiire. Omuntu weena orashangwe ngu niwe agashohoze naija kukwatwa kandi afubirwe,” Kalule arikuhamiza abantu.

#WestUpdates