Abantu 7 bafiire bwanyima y’okutomerwa emotoka y'omu 'convoy' ya Kyabazinga.

N’ebya Stuart Yiga

JINJA

Abantu 7 bahamiibwe kuba bafeeriire omuri butandu ebaire aha ruguuto rwa Jinja bwanyima y’emwe aha motoka za 'convoy' ya Kyabazinga kutaahira omu bantu ababaire bemeriire aharubaju rw’enguuto barikureeba ekirikugyenda omu maisho obu Kyabazinga wa Busoga, William Gabula Nadiope IV abaire naza aha kanisa ya Christ’s Cathedral Bugembe kugaitwa n’omukundwa we Jovia Mutesi.
 
Kyabazinga Nadiope IV Orwamukaaga ebiro 18/11/2023 agaitsirwe na Inhebantu Jovia Mutesi aha mukoro ogubaire ogw’ekitinisa.

Omugambirizi wa Pooriisi ahabw’ekyanga ekya Busoga, Michael Kasadha agizire ngu emotoka eya Super Custom ehandikirwe omu namba ya UAZ 742U, n’emwe aha motoka za convoy ya Kyabazinga ezibaire niziruga Kamuli zirikuza Bugembe omu rurembo orwa Jinja.

Emotoka egi negambwa kuba eremeriirwe omuvugi waayo yaheza kuhika omu ka tauni ka Nawantumbi aha ruguuto orwa Kamuli-Jinja shaaha nka 7:40 z’eihangwe.

Kasadha nakyoreka ngu abantu 6 bafeeriireho, abandi bantu 8 abatungire obuhuta bw’amaani bairukangiziibwe omu marwariro gatari gamwe kutunga okuragurirwa.

Beitu hoona, Pooriisi neegira ngu omuntu ondiijo aizire kufa bwanyima ekireeteire omubaro gw’abantu abafiire bahika 7.

Kasadha naagamba abantu abafiire nka; Godfrey Isabirye, 40, omutuura wa Nawantumbi, Kevin Abbo, 12, Lubale Waiswa, 30, omutuura wa Nalinaibi, Emmanuel Mutasa, 10, Katono Nabirye, 37 na Amisi Mutakubwa. 

"Omuntu owa 7 n’omukazi kandi ebirikubakwataho tibikamanyirwe,” Kasadha arikushoborora.

Aha bantu 8 abatungire obuhuta, 3 bariyo nibaragurirwa ah’eirwariro erya Kamuli General Hospital, 3 bari ah’eirwariro erihango erya Jinja kandi aband1 2 bari omu eirwariro ery’abantu bantu.

#WestUpdates