Abainazi bacwekyeriize orutookye n'omwani by'omutuura.

N'ebya Timothy Mushabe

KITAGWENDA

Habaireho ekikorwa ky'obwinazi omu kyaro ekya Kikurungo omu woodi ya Kikondo omu Tauni Kanso ya Kabujogera, disturikiti eya Kitagwenda ahi abantu abatakamanyirwe bataahiriire ekibanja ky'omutuura, Godwin Nampa bakacwekyereza orutookye rwe hamwe n'omwani.

Ahi ekikorwa eki kibeereireho, Godwin Nampa abaire atari omu kicweka eki beitu nyina Cleophas Jawe nashoborora ngu kibaireho shaaha nka 5 z'akasheeshe.

Cleophas Jawe arikugamba ekibeireho. PHOTO: Timothy Mushabe

Jawe nayongyera ashoborora ngu abakozire ekikorwa eki n'abasigazi abarikumweta nyin'ento kandi ngu ku batandikire kucwekyereza ebintu by'omutabani nawe nikwo kuza kweshereka arikutiinirira amagara gye.

John Jawe, ishe wa mukama w'ebintu ebicwekyereziibwe nayoreka okutiina bwanyima y'ekikorwa eki kandi naashaba ab'eby'okwerinda kutaaha omunshonga zaabo.Nayongyera agiira ngu eki kibaasa kuba kirugiriire aha buteikirizana oburi ah'eitaka eri.
Naagira ngu baherize kwiguraho omushango aha Pooriisi ya Kabujogera tauni kanso.

Julius Twinomujuni, mukuru w'ekyanga ekya Kikurungo arikugamba ahabwinazi obubaireho. PHOTO: Timothy Mushabe

Mukuru w'ekyanga ekya Kikurungo, Julius Twinomujuni yajumirira abakozire ekikorwa eki eky'okutwarira amateeka omungaro.

#WestUpdates