Omushaho wa UPDF afeeriire omuri butandu- Tororo.

N’ebya Faustine Odeke

TORORO

Omuserukare wa UPDF orikukora n’enkambi ya kashatu y’amahe eya Rubongi afeeriire omuri butandu y’ahanguuto omuri Tororo.

Moses Okera, 42, orikukora nka Laboratory technician afeeriireho obu ataahiire omu kimotoka ekibaire kyemeriire ahagati y’oruguuto. Butandu egi ebaireho omu mwabazo gw’orw’okubanza.

Okera obaire navuga piki ehandikirwe omu namba ya UEW 821B abaire naruga ahari Mbale blood bank Fahi abaire agiire kwihayo eshagama obu atomiire ekimotoka kyemeriire ekya namba UAW 263G/UAP 264U omu kyaro ekya Atiri, mayiro 10 kuruga omu tauni ya Tororo.

Orikukora nk’omugambirizi wa Pooriisi ahabw’ekyanga ekya Bukedi South, James Mugwe naagira ngu ebyahikireho kuruga omu kucondooza nibyoreka ngu omugyenzi agyerizeho kushara ekimotoka eki kandi obwo hariho emotoka endiijo ebaire neeruga omukono ogundi.

Naagira ngu ahabw’obutenda kutomerana buso bw’antaama, Okera acwiiremu kutaahira omu kimotoka ekibaire kyemeriire kitarimu muvugi weena kandi afeeriireho.

Baketi ebaire erimu epakiti nyingi z’eshagama eshangirwe aha mwanya ogu atungiireho butandu.

Pooriisi neegira ngu ekiretsireho butandu eki n’ekimotoka ekibaire kyemeriire ekikingiize oruguuto.

Mugwe naagira ngu omutumbi gw’omugyenzi gutwirwe omu kabafu ah’eirwariro erya Rubongi Military hospital kukyeberwa.

#WestUpdates