UNEB yaaragiira abeegi kugarukamu P.7 - Bushenyi

N’ebya Bruno Mugizi.

Omuramuzi w’eidaara ry’okubanza yaasindika omukihome Nyamushekyera Lilian Ayebazibwe, 56, mukuru w’eishomero rimwe omu Tauni Kanso ya Bitooma omu disiturikiti ya Bushenyi kuhisya ebiro 05.03.2024 ahabw’okugingirira ebipapura by’ebyarugire omubibuuzo by’abeegi b’ekyamushanju eby’omwaka 2023.

Ogu akakwatwa bwanyima y’omuzaire omwe kwibizaho ekitongore ky’eihanga ekirikutebeekanisa ebibuuzo ebi ekya Uganda National Examinations Board (UNEB). Ogu akagira ngu n’obu ebyarugire omubibuuzo by’omwana we bikaba bikwatsirwe aba UNEB, Ayebazibwe na bataahi be bakaba baakozire ekipapura kirikworeka oku omwana we akozire. 

Omukwebuuza yaaba ebyarugire omubibuuzo buzima nikwo omwana we yaakozire, omuzaire ou kooti etabaasa kugamba maziina akashaba UNEB kuhamya ekihandiiko. Na bwanyima kikaija kyamanywa ngu ekipapura kikaba kigingiriire.

Mukuru w’eishomero na bwanyima akaija yaatwarwa aha poorisi orwakabiri ebiro 27.02.2024 omumwabazyo nikwo kutwara omumbuga z’’ebiragiro eriizooba kugarukamu emanja ezirikumujunaanwa.

Orwakataano rw’eriizooba ebiro 01.03.2024, embuga z’ebiragiro ezaaba zeebembeirwe omuramuzi w’eidaara ry’okubanza, Omar Ahamed Halima, zaahurira ngu ebiro 08.02.2024, obwo ari ah’ishomero omu tauni kanso ya Bitooma, Ayebazibwe Lillian akagingirira ebipapura ebirikworeka ebirugire omubigyezo by’abeegi b’ekyamushanju eby’omwaka 2023 ekirikuhenda obushonshorekye bwa 342 na 347 bw’ebiragiro.

Omuramuzi yaagira ngu kooti ye teyine bushoboorozi kukora ahamushango gwe nikwo kumusindika Nyamushekyera omukihome kuhisya Orwakabiri ebiro 05.03.2024 kandi naija kugaruka omumbuga z’ebiragiro kugarukamu emanja ezirikumujunaanwa. 

Kooti kandi hoona yaaragiira abeegi kugarukamu ekibiina kyamushanju. 

Ahabwe Williams, orikukurira eby’obwegyese omu disiturikiti ya Bushenyi, yaamanyisa ku UNEB yaaragiira abeegi 109 ab’eishomero eri kugarukamu ekibiina kya mushanju bwanyima y’ebyarugire omubigyezo byabo kukwatwa ahabw’okukopa ebigyezo.

“Twatunga ekihandiiko kuruga omu UNEB kirikuturagiira kumanyisa abazaire b’abeegi abo abu ebigyezo byabo byakwatsirwe kugarukamu ekibiina kya mushanju. Twatebeekanisaho orukiiko n’abazaire hamwe n’akakiiko k’abarikwebembera eishomero Orwokubanza ebiro 04.03.2024 kubagambira ekibeireho n’okubahiga okwikiriza abaana baabo kugarukamu ekibiina kya 7,” Ahabwe nikwo yaagira.

#WestUpdates