Omukazi akwateirwe okwita omwana we- Bushenyi

N’ebya Bruno Mugizi 

BUSHENYI

Pooriisi omu disiturikiti ya Bushenyi ekwatsire omukazi w’emyaka 30 ahabw’okugambwa kuba aitsire omwana we w’emyaka 3.

Nyakuteekateekwaho amanyirweho Natumanya Edinah, 30, omutuura wa w’omu kyaro kya Muzira omu muruka gwa Kabare omu gomborora eya Kakanju omu disiturikiti ya Bushenyi.

Martial Tumusiime, Omugambirizi wa Pooriisi ahabw’ekyanga ekya Bushenyi empango naagira ngu ekikorwa eki kibaireho ebiro 12/03/2024 omu kyaro kya Muzira.

Nakyoreka ngu nyakuteekateekwaho ni nyina w’omwana ou aitsire na bwanyima akatimba ekiina omu rutookye haihi n’enju ya famire akamuzikamu.

"Bwanyima y’ekikorwa eki, nyakwita (Natumanya) agiire ah’eirwariro erya Kijumo Health Centre 11 nikwo kuteerera omushaija we esimu ngu arwire. Omushaija aizire yashanga omukazi we ah’eirwariro nikwo kumugiira ariyo naaza kwihamu akaheta. Omushaija ashashwire shiringi 5,000 nikwo omukazi kumwihamu akaheta. Bwanyima, omushaija atwire omukazi omuka kandi ku bahikireho, yabuuza ahi omwana ari, omukazi yamugambira nk’oku yashangire omwana waabo aniganigirwe atyo akamuziika,” Martial arikushoborora.

Turyamureeba Samuel, Omushaija w’omukazi oitsire agambire omunyamakuru weitu ngu bwanyima ya nyakuteekateekwaho kwikiriza ngu aitsire omwana ogu, amutwire ahi aitiire omwana ogu nahi amuziikire. Turyamureeba amanyiiseho abanyabuzaare be abaizire bakamutwara aha Pooriisi ya Ishaka ahabw’okuba abantu babaire nibenda kumwita.

Tumusiime naagira ngu omutumbi gw’omwana gutwirwe ah’eirwariro erya Kampala International Teaching Hospital Ishaka kukyeberwa obwo okucondooza kurikugyenda omu maisho.

#WestUpdates