Abakyala basabiddwa obutasigalira mabega mu byenkulaakulana

Omumyuka wa Katikkiro wa Uganda owookusatu, Rukia Nakadaama asabye abakyala Abasiraamu obutasigala mabega ku nsonga y’enkulaakulana, kubanga batambulirwako nnyo amaka gaabwe, naddala ensangi zino.

Minisita Rukia Nakadaama Ng'abuuza Abasiraamu. Ku Ddyo Ye Hajjat Hadijah Nambi

Bino abyogeredde ku mukolo gw’okuggalawo omusomo ku by’amaka Amasiraamu n’enkulaakulana, ogubadde ku ssomero lya Usaamah Primary School erisangibwa mu bbaalakisi ya poliisi e Nsambya.

Omusomo gwategekeddwa ekitongole kya Union of Muslim Women and Organisation in Uganda ekyatandikibwawo minisita yennyini, era gubadde gugenda mu maaso okuva ekisiibo lwe kyatandika.

Bayizi Ba Usaamah Primary School Nga Bayimbira Abaabadde Mu Musomo.

Nakadaama yagambye nti abakyala Abasiraamu balina okubeera ennyo ku mwanjo nga beenyigira mu nteekateeka ezikulaakulanya abantu, naddala eza gavumenti okuli ne Parish Development Model, kubanga balina obuvunaanyizibwa bungi obw’okutuukiriza, nga waliwo n’abasajja bwe babalekera.

Minisita era anokoddeyo okusoomoozebwa abasiraamu kwe basanga mu kufuna ssente za gavumenti ez’okwekulaakulanya, kubanga zibeerako amagoba mu kuzizzaayo, eddiini ky’etakkiriza, kwe kusaba gavumenti eyanguyirize ku nteekateeka ya bbanka ya Basiraamu ey’okwewola ssente ezitaliiko magoba, basobole okusitula embeera za bantu.

Nakadaama era yasabye Abasiraamu okusigala nga beeyisa bulungi ne bwe baba nga bamazeeko ekisiibo, olw’okuweesa Katonda ekitiibwa.

Hajjati Hadijah Nambi, omu ku baddukanya ekitongole ekigatta abakyala Abasiraamu yagambye nti mu kiseera kino bagezaako okunoonya abakyala Abasiraamu nga babawa ensimbi z’okwewola ezitaliiko magoba, kyokka nga balina enteekateeka nnene okutambula enkola eno okwetooloola eggwanga lyonna nga basomesa abakyala engeri y’okweggya mu bwavu.