Museveni alemedde ku nnamba puleeti ezirimu obuuma obulondoola

Bya Kizito Musoke

PULEZIDENTI Yoweri Museveni agambye nti tayagala kulaba muntu yenna alwisa kuleeta nnamba puleeti z’ebidduka ezirimu obuuma obulondoola.

Yabyogeredde ku ttendekero lya Kabalye Police Training School mu disitulikiti ye Masindi bwe yabadde afulumya abaserikale ba poliisi ba Probational Police Constables, Special Police Constables n’abakozi b’ekitongole kya Immigration abavunaanyizibwa ku bantu abayingira mu ggwanga nga bonna awamu baabadde 2,717.

“Nkyalemedde ku nnamba puleeti z’ebidduka ezirimu obuuma obulondoola kuba sikyayagala nnamba zitalina makulu. Buli kidduka ne bw’ebeera pikipiki njagala ebeere n’ennamba etuukana n’ebyokwerinda,” Museveni bwe yagambye.

Museveni yakikkaatirizza nti nnamba puleeti zino zaakuyamba nnyo okukendeeza obumenyi bw’amateeka naddala obutujju.

“Bano abatujju abatusumbuwa bonna bagenda kuttibwa nga tweyambisa enkola eno kuba tujja kuba tubalondoola buli we batambulira. Abatta abalambuzi

ku Queen Elizabeth National Park bandibadde baakwatibwa dda singa okunoonyereza tekwakwatibwa bubi,” bwe yagambye.

Ennamba empya zaatongozebwa nga November 2, ng’ebidduka bya Gavumenti bye bigenda okusooka okuteekebwamu ennamba zino.

Gavumenti ng’eyita mu minisitule y’ebyentambula n’ebyobutebenkevu yategeeragana ne kkampuni ya Russia ku ndagaano ya myaka 10 okuleeta tekinologiya ono gwe bagenda okweyambisa. Uganda tegenda kussaamu ssente, era kkampuni ya Russia y’egenda okusolooza ssente ezinaavaamu esobole okwesasula.

Pulezidenti yeebazizza abakulembeze ba Poliisi olw’okuweza abaserikale 53,000 okuva ku 3,000 ze baasangawo mu 1986. Kyokka ayagala bongerweko okutuuka ku 92,000 batuukagane n’ekiragiro ky’ensi yonna ekigamba nti omuserikale omu alina okuba ng’avunaanyizibwa ku bantu 500.

Abaserikale yabasabye beegendereze amasanyu baleme kukwatibwa bulwadde bwa siriimu, babeere n’empisa n’omwoyo ogulumirirwa eggwanga.

Minisita w’ensonga ez’omunda, Maj. Gen. Kahinda Otafiire yagambye nti abaserikale abaafulumye baakuyamba okwongera okunyweza obutebenkevu era n’abasaba okuweereza mu ngeri ey’obuvunaanyizibwa.

Omuduumizi wa poliisi mu ggwanga, Martin Okoth Ochola yeebazizza Pulezidenti olw’obuyambi bw’ensimbi n’okuwabula kw’azze abawa.

Mu kaweefube w’okutumbula embeera z’abaserikale, Ochola yagambye nti bali mu kuzimba ekitebe kya poliisi ekipya e Naggulu.

Banaatera okutandika okuzimba eddwaaliro ery’omulembe ery’ebitanda 300 e Nsambya era bazimbe n’amayumba 53,000.

Aduumira ettendekero lye Kabalye, Emitu Ezekiel Ebapu yategeezezza nti abaserikale abaafulumye babawadde obukugu obumala okusobola okukuuma amateeka n’obutebenkevu mu ggwanga.