Babbulaaza b’e Kisubi bakubye ebiragaano
Babbulaaza b’ekibiina kya Brothers of Christian Instruction, abamanyiddwa ennyo nga Babbulaaza b’e Kisubi bayingidde omwaka omuggya n’essanyu ery’enjawulo oluvannyuma lw’abannaabwe mukaaga okujaguza emyaka 25 mu bunnaddiini.
Katikkiro Mayiga ne Ssabasumba Paulo Ssemogerere (akutte omuggo) nga bali ne Babbulaza b'e Kisubi abaakubye ebiragaano ebisooka.
Bya Mathias Mazinga
Babbulaaza b’ekibiina kya Brothers of Christian Instruction, abamanyiddwa ennyo nga Babbulaaza b’e Kisubi bayingidde omwaka omuggya n’essanyu ery’enjawulo oluvannyuma lw’abannaabwe mukaaga okujaguza emyaka 25 mu bunnaddiini.
Ku bano kwabaddeko: Bro. Achleo Byekwaso, Bro. Edward Muteesasira Ssebuliba, Bro. Francis Mary Kiggundu, Bro. Jude Kaweesi, ne Bro. James Mukhwana. Bbulaaza omulala, ne Leonard Byankya (92) yajaguzza emyaka 70 mu Bunnaddiini.
Katikkiro Charles Peter Mayiga (ku Ddyo) Ng'akwasa Bbulaaza Leonard Byankya Eyajaguzza Emyaka 70 Mu Bunnaddiini Ekirabo.
Bano bonna bazzizza buggya ebiragaano byabwe eby’obunnaddiini mu maasao ga Ssenkulu waabwe, Bro. Casio Aizire, n'omusigire wa Ssenkulu w’ekibiina atuula e Roma, Bro. Vincent Ssekate.
Oluvannyuma Ssaabasumba Ssemogerere y’abasabidde era n’abakwasa omukisa gw’Obutume Paapa Francis gwe yabaweerezza.
Omukolo gwabadde mu Klezia ya St. Mary’s College Kisubi mu disitulikiti y’e Wakiso.
Bwe yabadde ayigiriza mu Mmisa, Ssaabasumba w’essaza ekkulu ery’e Kampala, Paulo Ssemogerere y’asiimye Bannaddini bano olw’omulimu ogw’ettendo gwe bakoledde Klezia, eggwanga, n’ensi yonna nga bayita mu butume bwabwe obw’okugunjula abaana n’abavubuka.
Ssabasumba Paulo Ssemogerere Ne Bro. Vincent Ngabakwasa Bbulaaza Leonard Byankya Omukisa Gw'obutume Paapa Francis Gwe Yamuweerezza.
Yategeezezza nti Babbulaaza bano nga beeyambisa amasomero gaabwe nga St. Mary’s College Kisubi, St. Henry’s College Kitovu, St. Savio Junior School ne Mugwanya Preparatory School Kabojja, basomesezza abantu ab’omugaso mu ggwanga bangi, nga mu bano mwe muli ne Katikkiro Charles Peter Mayiga.
Yabasabye bongere okukola omulimu gwabwe n’obumalirivu nga beetegefu okukola ekyo Omukama ky’ayagala nga balabira ku Bikira Maria.
Ssaabasumba Paulo Ssemogerere Ng'ayigiriza Mu Mmisa
Omukolo gwetabiddwaako ne Katikkiro Charles Peter Mayiga, naye eyasiimye ennyo obuweereza obulungi obwa Babbulaaza bano.
Mu ngeri ey’enjawulo y’asiimye bbulaalaza Leonard Byankya eyali Headimasita we n'gali e Kitovu, gwe yagambye nti y’asobola okutegeera ebitone bye yali alina, newaankubadde nga mukiseera ekyo yali muvubuka atali mwangu.
Ng'oggyeeko Babbulaaza abaajaguzza jubileewo, waliwo Babbulaaza 9 abaakubye ebiragaano byabwe ebisooka, at abavubuka 13 ne bayingizibwa mu Novicia y’ekibiina.