Ddereeva wa Harrier eyakubye mu ttakisi amasasi ne gakwata omwana poliisi emukutte

Ddereeva w'emmotoka ekika kya Toyota Harrier nnamba UBQ 699B akwatiddwa, ku bigambibwa nti aliko omwana ow'emyaka 12 gw'akubye essasi erimulumizza.

Edrine Babalanda yakubiddwa essasi ku Lwokubiri ekiro, bwe yabadde mu takisi ng'evugibwa Robert Nsubuga.

Kigambibwa nti omusajja yakubye mu ttakisi amasasi nga kigambibwa nti yabadde agezaako okukuba ababbi ,abaabadde bagezaako okumubba ng'avuga emmotoka.

Mu mbeera eyo, kigambibwa nti essasi, lyakutte omwana ono eyabadde atudde ku mutto ogw'emabega era kitaawe Moses Babalanda n'amutwala  mu ddwaliro e Mulago gy'ali mu kufunira obujjanjabi.

Omwogezi wa poliisi mu Kampala, Patrick Onyango, agambye nti  akwatiddwa ye Mohammed Kitaka era nga bamuguddeko omusango gw'okugezaako okutta omuntu.