Akabenje katuze owa UPDF e Lukaya abalala ne basimattuka nebisago

OMUJAASI wa UPDF omu afiiriddewo abalala mukaaga ne batwalibwa mu ddwaliro ng'embeera mbi oluvannyuma lw'emmotoka kabangali kwe babadde batambulira okutomera emmotoka endala ne yeevulungula emirundi egiwera.

Embeera Nga Bwe yabadde Awaagudde Akabenje

Omwogezi wa poliisi e Masaka Twaha Kasirye ategeezezza nti afiiriddewo ye Lance Corpol Zubair Aniko ow'enkambi y'e Mbarara ng'abadde omu ku bawerekera omukulu mu magye Maj.Gen Paul Muhangi nga bava Mbarara boolekera Kampala.

Akabenje kano kagudde Bajja mu Lukaya Town Council e Kalungu ku luguudo lwa Kampala-Masaka nga kabangali eno Toyota Land Cruiser namba DO2DF083 etomedde Toyota Harier nnamba UBG 979J ebadde edda ku lw'e Masaka wabula ku bagibaddemu tewali alumiziddwa.

Mmotoka Harrier Kawundo Eyatomeddwa.

Wabaddewo obunkenke ng'amagye ne poliisi y'ebidduka nga baggyawojjawo abalumiziddwa n'okujjawo omulambo ekivuddeko n'entambula okusanyalala ng'ebidduka bitambula kasoobo.

Akabenje kano kagudde kumpi ne ggeeti y'essomero lya St Joseph Bajja P/S era abamu ku batuuze abasangiddwawo basabye be kikwatako okuteeka obugulumo n'obubonero obulala obulabula mu kitundu kino nti kitaase ku bubenje obugwawo entakera.