Abeesimbyewo 10 battunka leero mu kukubaganya ebirowoozo ku Bukedde TV ne ku Bukedde Fa Ma

LEERO ku Bukedde TV ne ku Bukedde Fa Ma leediyo Embutuukizi, ekibanyi kyakugwa n’amenvu ng’abeesimbyewo mu kalulu ka Kawempe North bakubaganya ebirowoozo.
Okukubaganya ebirowoozo kutandika ku ssaawa 2:00 ez’ekiro okutuuka ku 4:00. Amangu ddala nga Agataliiko Nfuufu gawedde, abeesimbyewo bagenda kukomawo ku ssaawa 5:00 baddemu ebibuuzo by’abalabi n’abawuliriza.
Abeesimbyewo 10 kuliko; Faridah Nambi (NRM), Erias Luyimbazi Nalukoola (NUP), Henry Kasacca Mubiru (DP), Ismail Musiitwa (PPP), Sadat Mukiibi (FDC), Muhamood Mutazindwa, Moses Nsereko, Muhammed Lusswa Luwemba, Hanifa Karadi Murewa ne Stanley Edward Maitum Engena. Engena mutabani w’eyaliko Pulezidenti wa Uganda, Milton Obote.
Maneja wa Bukedde TV, Richard Kayiira Ssaalongo yagambye nti okukubaganya ebirowoozo kugendereddwaamu okuwa abalonzi omukisa okutegeerera ddala enteekateeka z’abeesimbyewo n’ebirowoozo bye balina eby’okukulaakulanya ekitundu.
Ng’eggyeeko ebirowoozo by’abeesimbyewo, wagenda kubeerawo okwanukula ebibuuzo by’abantu ebinaaba biweerezeddwa mu Pulogulaamu.
Omuntu yenna alina ekibuuzo oba ekirowoozo osobola okukiweereza ku nnamba y’essimu eya 0762988247.
“Atabeere ku Bukedde TV ne Bukedde FM ajja kuba asubiddwa omukisa gw’okutegeerera ddala abeesimbyewo n’obusobozi bwabwe okukiikirira abantu be Kawempe North” Kayiira bwe yagambye.
Okukubaganya ebirowoozo kugenda kuweerezebwa butereevu ku Bukedde TV 1, Bukedde TV 2, ne Bukedde Fa Ma Embuutikizi.