Museveni atangaazizza ku bipapula

PULEZIDENTI Museveni atangaazizza ku bipapula eby’engassi  ku baddereeva abavuga endiima n’abakozesa obubi ekkubo,  ebibadde bireese ensasagge mu  ggwanga n’agamba nti ekigendererwa kya kkamera z’oku nguudo  ne nnamba ezirimu obuuma 
obulondoola mmotoka, kyali kya  byakwerinda sso si kutanza bantu  abatambulira ku kkubo.
Bino Museveni yabyogeredde  Kololo ku mukolo gw’okusoma  bajeti y’omwaka gw’ebyensimbi  2025/26, eri ku mulamwa ogugamba nti; Okuzimba ebyenfuna   ebitambulira ku ssente, okuyita  mu byobulimi ebikola ssente,  amakolero, okugaziya obuweereza,  okusituka mu bya tekinologiya,  n’okufuna akatale k’ebyamaguzi.
Bwe yabadde amaliriza okwogera kwe, Museveni yakikkaatirizza nti okutanza abantu ku  makubo si kye kyali ekigendererwa kya kkamera z’oku nguudo  ekikulu. Ensonga enkulu yali ya  kutangira bumenyi bw’amateeka, 
nga poliisi n’ebitongole ebinoonyereza bikozesa kkamera n’obuuma  obulondoola ebidduka okusobola  okugwa mu buufu bw’abatemu  ’abamenyi b’amateeka abalala.
Yennyamidde olw’ettemu  eryakoleddwa ku nnannyini  ssomero lya Beloved Daycare and  Nursery School e Mukono, Godfrey  Wayengera, kyokka abatemu ne  batakwatibwa. Abatemu bano  Museveni yagambye nti bakolera  u nkola ya “Munaatukola ki” ne  batta abantu anga teri abakuba ku  Mukono. Yagambye nti eyo singa  waabaddeyo kkamera ezoogerwako, kyandibadde kyangu okukwata 
abatemu abo.
Kino Museveni yagambye nti  tagenda kukikkiriza, era poliisi  eteekwa okulwanyisa obutemu  obw’ekika kino.
AVUMIRIDDE BANNABYABUFUZI  ABAGULIRIRA ABALONZI
Museveni era yavumiridde bannabyabufuzi naddala ababaka  ba Palamenti abagifudde enkola  okugulirira abalonzi, ne batuuka  n’okweteeka ku pulojekiti eziggya  abantu mu bwavu ate nga tebazisobola.
Abamu ku bano Museveni  agamba nti ensobi eno ebafudde  emmombooze mu nsi yaabwe,  olw’amabanja amangi ge balina,  nga tebakyasobola na kudda mu  bitundu gye bakiikirira