Abazigu ab'emmundu 3 basindiridde omusuubuzi ebyasi ne bamwambula empale ne babulawo ne ssente.

Abazigu ab'emmundu 3 basindiridde omusuubuzi ebyasi ne bamwambula empale ne shooti ne babulawo ne ssente.

Byabadde mu kisenyi ky’e Busiiya mu muluka gw’e Kalamooya Buwenge Tawuni kanso
mu Jinja, abazigu ababadde mu mmotoka ya buyonjo bwe baalondodde Peter Musiira, omusubuuzi omututumufu ne bamusindirira ebyasi nga agenda okusuubula.

Omudumiizi wa poliisi mu kitundu ky’amambuka ga Kiyira, Morris Oyee akakasizza ettemu lino eryabaddewo kumakya g’Olwokuna ku ssaawa 1:30.

Musiira, 34, abadde n’edduuka erisuubuza cakalacakala mu kabuga k’e Luzinga
nga yalinnye boda okuva e Luzinga ng’ayolekera Buwenge agende e Jinja.

Moses Waiswa, owa boda boda nnamba UFH 782N, yagambye nti aliko omusaabaze gwe yasoose okulonda ku kyalo Lubaale wabula olutuuse e Luzinga, Musiira yabayimirizza naye bamutwaleko.

Waiswa agambye nti obwedda Musiira aliko bye yeerabira mu dduuka nga kino akikoze emirundu 3 nga bamugumiikiriza. Olutuuse we bali ne basimbula.

Wabula olwabadde okumalako ekisenyi kya Chico, kwe kulaba emmotoka ebavaako emabega ng’etambula mpola.

Wano Musiira kwe kumusaba abawe ggaapu naye nga tebabayitako. Wadde baabadde bekengera emmotoka eno, Waiswa yategeezezza nti baabadde balowooza nti beepena binnya.

Olwabadde okukkirira mu kisenyi kya Busiiya, nayongeza ggiya n’abazigu nabo ne bakoleeza era bagenze okulaba nga babakiika emmotoka.

Wano abasajja 3 abaabadde babagalidde emmundu baafulumye mmotoka ne basamba Waiswa n’aggwa mu luwonko ne pikipiki ye ne badda ku musabaaze omukazi naye ne bamukuba bubi.

Oluvannyuma bakkakkanye ku Musiira ne bamusikaasika nga baagala kumuyingiza mmotoka ne yeerema. Ekyaddiridde kwabadde kumukuba amasasi 3 mu bigere era nagaana okuyingira okutuusa bwe baamukubye mu kifuba n’afiirawo.