Poliisi ekutte mmotoka 2 kwe babadde batambuliza waragi n'amanda

POLIISI eriko emmotoka bbiri z'ekutte nga bazitambulizaako waragi n'amanda mu bitundu by'e Bukwo.

Kino kiddiridde poliisi okusuula emisanvu mu kkubo ku kyalo Kabei ,n'ekwata emmotoka nnamba UBP 711 P  Isuzu okubadde ebidomola by'enguuli 30.

Kigambibwa nti emmotoka eno ya Moses Mutai 38 omusuubuzi mu kitundu ky'e Bukwo.

Kiddiridde ebitongole ebikuumaddembe, okuwera waragi, nga kigambibwa nti abamu ku babbi b'ebisolo, gwe beeyambisa mu kutamiira, ne bakola obulumbaganyi naddala mu bitundu by'e Karamoja.

Mu ngeri y'emu era, waliwo emmotoka endala nnamba UAT 511A ekwatiddwa nga kuliko ensawo z'amanda 120 e Katakwi nga bagatwala Mbale.

Eno ebadde ya Ali Lochol okusinziira ku mwogezi w'ekitongole kya poliisi ekirwanyisa obubbi bw'ebisolo ekya ASTU , Mike Longole.