Omulabirizi wa West Buganda omuggya yeeyamye okugatta Abakristaayo

OMULABIRIZI wa West Buganda eyaakalondebwa, Rev. Can. Gaster Nsereko , agambye nti ng'oggyeeko okubuulira enjiri, waakufuba okulaba ng'ayongera okugatta Abakristaayo mu Bulabirizi buno.

Bino abyogeredde mu situdiyo za Bukedde Fa Ma Embuutikizi, gy'akyadde leero ku nkya era ng'awerekeddwako omuwandiisi w'Obulabirizi, Rev. Can. Moses Kayimba, Omuwanika, Rev. Can. Herbert Fred Matovu n'akuliddemu olukiiko oluteekateeka okumutuuza, Can. Alice Ddamulira.

Rev. Nsereko ng'ali mu kifaananyi n'omukozi wa Bukedde, Detective Kigobero.

Rev. Can. Nsereko nga mu kiseera kino ye Ssaabadinkoni w'e Kakoma e Kkooki, waakutuuzibwa ku ntebe y'Obulabirizi nga March 30, ku kkanisa e Kako, ng'adda mu bigere by'Omulabirizi Katumba Tamale eyawummudde oluvannyuma lw'emyaka Munaana ng'ali mu kifo ekyo.

Nsereko ye Omulabirizi Ow’omusanvu. Basuubira abantu wakati wa 5,000 na 7,000 abagenda okugwetabako era ng'Omukulembeze w'eggwanga , asuubirwa okwetaba ku mukolo guno, ogugenda okutandika kumakya.

Akoowodde Abakristaayo okwongera okuwagira Obulabirizi era ne yeeyama okugenda mu maaso ng'atandikira ku mukadde waffe Omulabizi Katumba Tamale ,wakomye.

Agasseeko nti waakufuba okulaba ng'ebyenfuna byeyongera ng'Abakristaayo basomesebwa ennunda n'ennima ey’omulembe n'okubabuulira enjiri.

Ye omuwandiisi w'Obulabirizi buno, Rev. Can Moses Kayimba akoowoodde abantu okwetaba ku mukolo mu bungi.

Can. Alice Ddamulira, agambye nti bakyagenda mu maaso n'okusonda ssente, ziyambeko ku mukolo ogwo era n'akowoola abantu , okuwaayo mu bungi nti kuba mu kiseera kino, beetaaga obukadde obulala nga 200.

Oluvannyuma Rev Can Nsereko, ne ttiimu ye, basisinkanye akulira kkampuni ya Vision Group, Don Wannyama era naye n'asuubiza mu kulaba ng'enteekateeka zonna, bongera okuzimanyisa abantu.