Omuyimbi Fik Gaaza bamukwatidde mu beebijambiya

POLIISI ekutte omuyimbi Shafik Jjingo abangi gwe bamanyi nga Fik Gaza ku bigambibwa nti abadde yeenyigira mu bubbi n’okukola efujjo ku bantu ab’enjawulo.

Omwogezi wa Poliisi mu Kampala n’emiriraano, Patrick Onyango yategeezezza nti ono yakwatiddwa ne banne abalala okuli Najib Magoola, David Mutuba amanyiddwa nga Marvin Gaza, wamu ne Charles Zziwa amanyiddwa nga Muzungu.

Ebimu ku bintu ebigambibwa okusangibwayo.

Baakwattiddwa mu kikwekweto ekyakoleddwa ekitongole kya Poliisi ekikkessi ekya Directorate of Crime Intelligence nga bali wamu n’ekitongole kya Flying Squad, okuva e Katwe oluvannyuma lw’abatuuze b’e Katwe ne Makindye n’ebitundu ebiriraanyeewo okwekubira enduulu nga beemulugunya ku kikoosi kyabwe.

Poliisi egamba nti olw’okuba bano babadde bazibu okufuna, baabazingirizza gye basula oluvannyuma ne babatwala ku Poliisi gye bakuumirwa nga n’okunoonyereza bwe kugenda mu maaso.

Waliwo ebissi okuli ejjambiya, ebyambalo by’amagye saako ebiragalalagala Poliisi bye yazudde mu maka ga Fik Gaza, era nga Poliisi yategeezezza nti bigenda kkola ng’obujulizi nga ekiseera ky’okubatwala mu kkooti kituuse.

Okunoonyereza kulaga nti omu ku baakwattiddwa (Charles Zziwa) abadde anoonyezebwa oluvannyuma lw’okutoloka mu kaduukulu ka Poliisi gye yali atwaliddwa ng’avunaanibwa omusango gw’okutta omuntu, era nga ne ffayiro ye ebadde yaggwa dda.

Poliisi yalaze obwennyamivu olw’abayimbi abeegulidde omuze gw’okutondawo ebibinja by’ababbi abatigomya abantu bye baakazaako ‘Eggaali’.

Bano babaza abantu abatambula oba ababa bakung’aanye okugeza; mu bivvulu by’abayimbi, mu mabaala, ku mikolo, oba ku nnyimbe, ne babanyagulula amasimu ne ssente enkalu nga kwe bagasse n’okubakuba.

Bino bigenze okubaawo ng’omuyimbi Patrick Mulwana amanyiddwa nga Alien Skin, naye yaakava mu kkomera ku nsonga yeemu.