Owabbooda bamusibye emyaka 28 lwa kukaka musaabaze mukwano

Christopher Ddamulira nga yali mugoba wa bodaboda e Kanoni Saza Cell mu Kanoni town council e Gomba y’asindikiddwa mu kkomera olw’okukaka omuwala ow’emyaka 17 eyali amupangisizza okumutwalako ,omukwano.

Ddamulira omusango yaguzza nga March 29, 2018 e Kanoni ku luguudo oludda e Mayangayanga ne yeekakaatika ku muwala (amannya gasirikiddwa) nga talina lukusa.

Omuwala ono yategeeza kkooti nti yali asoma ku UDEL ng’abeera Mayangayanga era ku lunaku bino lwe byagwawo yali ava ku ssomero ku kabaga ka matikkira. Olw’okuba obudde bwali buzibye, yapangisa bodaboda emutwale awaka era ne bakkiriziganya okumutwala ku 5,000/-.

Omuwala yabuulira kkooti nti owabbooda ono yali amumanyi mu ffeesi naye nga tamumanyi linnya ,era yamutwala kyokka bwe baatuula mu kitoogo Ddamulira n’asiba bbooda nti yali eweddemu amafuta.

Kyokka omuwala ono agamba nti Ddamulira yamukwata omukono okumutwala mu nsiko n’agezaako okugaana ng’alekaana n’amunyiga obulago nga tasobola kufulumya ddoboozi olwo n’amusobyako.

Mu kugezaako okwerwanako omuwala engatto ye emu yavaamu ,era n’akwale ke ak’omunda yakamuggyamu n’atamanya gy’akatadde. Oluvanyuma Ddamulira yabuuza omuwala oba amumanyi era olw’okutya yagamba tamumanyi.

Omuwala ono yatuuka awaka ng’avaamu omusaayi era nnyina yamutwala ku ddwaliro ne kizuulibwa nti yali akakiddwa omukwano.

Poliisi yagenda mu kifo okunoonyereza engatto n’akawale ne bizuulibwa mu kifo awo ne Ddamulira n’akwatibwa.

Ng’oludda oluwaabi lumaze okuleeta abajulizi bataano, Ddamulira yeefula n’akkiriza omusango bw’etyo kkooti n’emusingisa ogw’okukaka omuwala omukwano n’asibwa emyaka 28 n’emyezi ebiri.

Wabula, oluvannyuma yajulira ng’agamba nti kkooti yamusiba omusango mukyamu kubanga omwana wansi w’emyaka 18 kubeera kukkabassanya si kukaka mukwano. Baamuwa ekibonerezo kikakali ng’ate omulamuzi teyagoberera mitendera mituufu mu kumusingisa ogw’okukaka omuwala omukwano.

Abalamuzi ba kkooti ejulirwamu okuli Christopher Gashirabake , Dr Asa Mugenyi ne John Mike Musisi bw ebabadde bagoba okujulira kwa Ddamulira baagambye nti empaaba y’oludda oluwaabi okwavunaanibwa Ddamulira ogw’okukaka omuwala omukwano ntuufu kubanga yakozesa eryanyi mu kikolwa kino.

Abalamuzi era bongeddeko nti pkukaka omuntu omukwano aguzizza asibwa wakati w’emyaka 30 n’akalabba n’olwekyo emyaka 28 gyali gimala tasaanye kwemulugunya.

Abalamuzi era baazudde nti omulamuzi eyamusalira talina nsobi yonna gye yakola ng’amusiba noolwekyo bamulagidde amaleyo emyaka 28 egyamusalirwa.