Abatuuze basse makanika gwe balumirizza okubba bodaboda nga yeefuula azikanika

Abatuuze batwalidde amateeka mu ngalo ne  batta agambibwa okuba omubbi wa bbooda n'oluvannyuma omulambo gwe ne baguteekera omuliro.

Bibadde mu zzooni ya Nabitende e Nakaloke mu kibuga ky'e Mbale, abatuuze okuli n'aba bodaboda bwe basse Jamiru Mukose 35 makanika nga bamulumiriza okuba mu kibinja ekibba pikipiki.

Kitegeezeddwa nti bazze bamulondoola okuva e Kaliro gy'agambibwa okubba pikipiki nnamba UEZ 962 J Bajaj ne bagisanga mu nnyumba ye.

Omwogezi wa poliisi e Mbale Rogers Taitika, ategeezezza nti mu nyumba era, bazuddemu ebintu ebirala omuli nnamba plates za pikipiki, n'ebyuma ebirala.

Agasseeko nti, omulambo gutwaliddwa mu ggwanika ly'eddwaaliro e Mbale okugwekebejja ng'okubuuliriza kugenda mu maaso.