Okusaala eid e Luweero ; Abaayo basabiddwa okukuuma emirembe nga beemalira mu nteekateeka ezinaasitula ebyenfuna byabwe

MINISITA avunaanyizibwa ku Kanyigo ka Luweero Alice Kaboyo asabye Bannaluweero okukuuma emirembe era beemalire mu nteekateeka ezigenderera okusitula eby'enfuna byabwe.

Minisita Kaboyo ng'asaala

Asinzidde mu kusaala Eid ku muzikiti e Kasana mu Luweero n'ategeeza nti gavumenti efubye okukola ku nsonga za Luweero era ekyazikolako omuli okusasula abaazirwanako, okukola enguudo, okuzimba eddwaliro lya Kasana, okumaliriza ekitebe kya disitulikiti, okubunyisa amasannyalaze mu byalo, PDM n'ebirala.

Abasiraamu abasabye okwewala ebikolwa ebibavumaganyisa ne batuuka okubayita abatujju, okuweerera abaana ate babakuze mu mpisa.

Abasiraamu abaasadde Idd mu kusaba

Omumyuka wa disitulikiti, Khadi wa Luweero asooka Sheikh Twaha Lubega asabye Abasiraamu okutya Katonda n'okumugondera nga Yibulayimu bwe yakola bakole by’ayagala.

Abakubirizza okwagala bannaabwe nga beewala enge, obutaagaliza, ettima, omululu n'ebikolwa ebibi.

Abagenda mu by'obufuzi abasabye beewale okwawula mu bantu n'okusiga obukyayi. Abasabye okugondera abakulembeze n'okwagala eggwanga lyabwe.