Omukazi agambibwa okusalako bba ebitundu bye ebyekyama akwatiddwa

OMUKAZI omusuubuzi agambibwa okusalako bbaawe ebimu ku bitundu eby'ekyama, akwatiddwa poliisi.

Omukazi ono ategeerekeseeko erya Rehema 40, y'agambibwa okukakkana ku bba Richard Masanka 60 omutuuze w'e Busigo cell mu Nothern Division e Kamuli , n'amusalako ebitundu bye eby'ekyama.

Kigambibwa nti bano bombi, babadde waka, Omwami kwe kugenda mu buliri era ng'eno omukyala gy'agambibwa okumusanga n'agezaako okumutuga nga n'ekyaddiridde kwe kumusalako ebitundu bye ebyekyama.

Omwogezi wa poliisi mu Busoga North, Micheal Kasadha, ategeezezza nti abatuuze basobodde okumuddusa mu ddwaaliro lya Kwagala Medical Centre  e Buwengempya nti n'oluvannyuma ne bamwongerayo e Kamuli.

Ayongeddeko nti omukazi bamukutte era ng'okunoonyereza kugenda mu maaso, kyokka n'akubiriza abafumbo okukomya ebikolwa eby'okutwalira amateeka mu ngalo.