Kitalo! Bannayuganda 6 bafiiridde ku kyeyo e Kuwait omulundi gumu!

BANNAYUGANDA mukaaga abaagenda e Kuwait okukuba ekyeyo, omuliro gubookerezza mu kizimbe mwe babadde basula ne bafiiramu.

Ekizimbe Ekyakutte Omuliro Bannayuganda Mwe Baabadde.

Okusinziira ku Bannayuganda abalala abali e Kuwait, omuliro guno gwakutte ennyumba ezipangisibwa, ku Al-Riggai Residential Building, Bannayuganda bano kwe babadde basula. 

Gwakutte ku ssaawa 10:00 ng’obudde bukya ne bayandayanda okunoonya ow’okuyita bafulume, kyokka ng’omuliro gumaze okusalako buli wamu, okukkakkana nga bafudde. Abaafudde kuliko; Gota Wilberforce, Fred Ndawula, Esawo Gaganga, Ian Jonathan Musiime, Harold Kafeero ne Hudson Kikomeko.

Harold Kafeero yafudde.

Akulira ekitongole kya ‘Kyeyo Initiative – Uganda’, ekirwanirira eddembe lya bankubakyeyo, Kenneth Oloka, yagambye nti bye baakazuulawo biraga ng’abavubuka bano babadde bakola ogw’okutambuza ebyamaguzi okuva mu kkampuni ez’enjawulo ne babituusa ku bantu ababigula nga bakozesa omutimbagano.

Kyazuuliddwa nti Gitta yava Luweero ku kyalo Busula ate Gaganga bamuzaala Kakindu mu disitulikiti y’e Mityana.

Ahmada Taika ali mu mbeera mbi

Oloka era yagambye nti emirambo ebiri okuli ogwa Ndawula ne Musiime, gyasiridde nnyo, ng’abasawo bagenda kusooka kukebera ndagabutonde okukakasa oba beebo, oluvannyuma enteekateeka z’okukomyawo emibiri gyabwe mu Uganda zitandike okukolebwako.

Mu kiseera kino, Oloka agamba nti baakwataganye dda n’ekitebe kya Uganda e Saudi Arabia okulaba nga bakwatagana bulungi ne kkampuni eyatwala abavubuka bano okukola ku by’okuzza emirambo.

Gotta Wilberforce mufu.

Oloka era yannyonnyodde nti wabadde tewannabaawo katuubagiro mu kuzza emirambo gy’abavubuka bano kuba babadde bakyakwatagana bulungi ne kkampuni ebadde ebakozesa era nga balinda ebinaava mu kukebera endagabutonde balyoke bamanye pulogulaamu y’okubakomyawo nga bweneetambula.

Miriam Namutebi, ssentebe wa Bannayuganda abali e Kuwait, agamba nti ku bantu omunaana abaakosebwa, babiri be baasimattuse okuli Ahmad Taika ng’akyali ku byuma n’omulala eyategeerekeseeko erya Batesita ye teyafunye kisago kyonna.

Esawo Gaganga naye mufu.

Yasabye Gavumenti okuvaayo ebayambeko mu mbeera eno, kuba bingi ebyetaaga ssente okusobola okuyamba okukomyawo emirambo gino.

Namutebi era yagambye nti ebyakazuuka biraga nti omuliro gwavudde ku kimu ku byuma ebiwujja empewo (air conditioner) ekyabaluse ne kikwata omuliro ku mwaliiro ogwokutaano ne gusaasaanira n’omwaliiro ogwomukaaga.

Hudson Kikomeko naye yafudde.

Emirambo gyayawuddwaamu emirundi ebiri, ng’esatu gyatwaliddwa mu ggwanika ly’e Dhagij ate abalala nga bali mu ly’e Subhan.

Namutebi yagambye nti mu Kuwait, waliyo Bannayuganda abasoba mu 10,000 abakola
emirimu egy’enjawulo omuli baddereeva abatambuza ebyamaguzi, abasawo, abakola mu wooteeri, abayonja, n’abalala.

Ian Jonathan Musiime yafudde naye.