Obulunzi n’obulimi bye bijja okulwanyisa obwavu n’ebbula ly’emirimu - Museveni

PULEZIDENTI Yoweri Kaguta Museveni akubirizza Bannayuganda okwongera okwekwata obulimi n’obulunzi, nti bye bijja okubabbulula mu bwavu bwe balimu.

Yabyogeredde ku ssomero lya Iringa Township P/S mu ggombolola
y’e Nkondo mu disitulikiti y’e Buyende ku Lwomukaaga, bwe yabadde ku mukolo gw’okwebaza Katonda ogwategekeddwa Minisita w’Ensonga z’Obwapulezidenti, Milly Babirye Babalanda.

Minisita Babalanda.

Babalanda yabadde yeebaza by’ayiseemu mu bulamu n’okusimattuka ekimbe kya Covid-19 ekyamuyisa obubi. Museveni yagambye nti tekikola makulu okukanda Gavumenti enguudo naddala eza kolaasi, kyokka abantu ne batazikozesa kutumbula byanfuna yaabwe.

Yagambye nti obulunzi n’obulimi bukoze kinene okuggya abantu mu bwavu n’okuwa emirimu. “Obulunzi n’obulimi bufumbekeddemu obugagga.

Y’ensonga lwaki ne mu byalo ewala eteri masannyalaze oba kolaasi, eriyo abagagga. Kino nkiremerako buli omu waali alina okukozesa enkulaakulana Gavumenti z’ereese, okweggya mu bwavu,” Museveni bwe yagambye.

Okusaba kw’akuliddwa Omulabirizi w’Ekkanisa ya SDA mu Busoga, Pr. James Kajura ne Ssaabalabirizi w’Ekkanisa ya b’Abadiventi mu Uganda, Dr. Moses Maka Ndimukika. Babalanda yawadde obujulizi nti Covid-19 yamukuba ku ndiri n’abeera mu kkoma ennaku 7, agenda okudda engulu ng’ali mu ddwaaliro ly’e Mulago. 

Pulezidenti Museveni (ku Mmotoka) Ng'atuuka Awaabadde Omukolo.

Pulezidenti Museveni yalagira n’atwalibwa ebweru w’eggwanga n’afuna obujjanjabi obwenjawulo kwe kussuuka.

Yeebazizza Katonda olw’okumuwa omukisa n’alinnya amadaala, nga yatandika nga Kaada wa NRM eyayiggiranga Rebecca Kadaga obululu era nga ye yamutwala ewa Museveni n’atandika okumuyiggira obululu mu ggwanga lyonna. 

Yasiimye Pulezidenti Museveni ak’ensusso olwokumuwa amagezi n’addayo n’asoma nga mu kiseera kino yamaze okufuna diguli mu mbeera z’abantu okuva e Bugema University.

Museveni yasiimye Babalanda ng’omukazi eyakuzibwa n’empisa nga yamuwadde obukadde 100 ez’okutegeka omukolo n’amuwa n’obukadde obulala 30 ez’okuzimba ekizimbe ky’ekitebe kya Busoga SDA Field e Nawansinge mu disitulikiti y’e Iganga.