2 abagambibwa okuba ababbi b'ente aboolulango bakwatiddwa poliisi

ABANTU babiri abagambibwa okuba ababbi b'ente aboolulango, bakwatiddwa mu muyiggo gwa poliisi okulwanyisa obubbi bw'ebisolo e Bugweri.

Ekikwekweto kino, kikoleddwa mu ggombolola y'e Buyaga mu disitulikiti y'e Bugweri, gye bakwatidde abalaaalo babiri okuli Kenneth Soosi 22 ow'e Bumozi ne Fazir Kakaire 22 abagambibwa okuba emabega w'obubbi bw'ebisolo naddala ente mu kitundu ekyo.

Abatuuze, baludde nga balaajanira poliisi okubayambako ku bubbi bw'ebisolo obukudde ejjembe , kwe kukola ekikwekweto ne bakwata babiri ne bazuula n'ente ennume emu egambibwa okuba enzibe

Omwogezi wa poliisi mu Busoga East Micheal Kafaayo, agambye nti bakyayigga n'abalala batwalibwe mu kkooti.

Agasseeko nga n'e Kibaale e Namutumba, nayo bwe babbye embuzi 7 eza Amos Mugoya 40 omutuuze w'e Kasozi  - Nkajja ezimu ne bazisalira mu kifo ekyo ate endala ne bagenda nazo.

Kafaayo ayongeddeko nti batutte embwa  ezikonga olusu, kyokka tebalina gwe bazudde ng'okunoonyereza , kugenda mu maaso