Mulonde abanaabanja bye mwagala - Pulezidenti Museveni

PULEZIDENTI Museveni annenyezza ab’e Mawokota okulonda obubi n’abasaba okulonda ababaka abasobola okubabanjiza ebyabwe n’okubirondoola.

Bwe yabadde alambula abalimi 10 abafunye mu nteekateeka za PDM mu disitulikiti y’e Mpigi eggulo ku Mmande, yagugumbudde abantu abaagala ennyo okubeera mu bibuga n’abasaba badde mu byalo beenyigire mu bulimi n’obulunzi beegobeko obwavu.

Pulezidenti Ng'alambula Ffaamu Ya Hajji Zziwa (wakati).

Bino abyogeredde mu maka ga Hajji Muhammad Zziwa e Sserinnyabbi mu ggombolola y’e Kammengo mu Mpigi gy’alambulidde emirimu gy’akolera ku yiika ennya (4) okuli okulundirako enkoko, ente gattako okulimirako yiika y’olusuku ne yiika y’emmwaanyi.

Museveni asiimye Hajji Zziwa olw’enkulaakulana gy’atadde ku kitundu n’amuwa obukadde 12, emmotoka ekika kya Double Cabin n’amusuubiza ne pampu y’amaanyi g’enjuba eyambeko ekyalo okufuna amazzi ag’okufukirira ebirime n’ag’ebisolo.

Yasiimye n’abalimi 10 abasukkulumye ku bannaabwe mu Mpigi okukozesa obulungi ssente za PDM n’abawa ebbaasa ya kakadde buli omu, ate ssentebe w’ekyalo, Patrick Ssennabulya naye n’amuwa ebbaasa ya bukadde mukaaga zimuyambeko ku ntambula.

Omuwabuzi wa pulezidenti ku nsonga z’ebyobusuubuzi Amelia Kyambadde yasabye Pulezidenti okubayamba ku ntambula y’ekizinga ky'e Buyiga abawe ekidyeri ekisomosa abantu, ettendekero ly’abavubuka ery’ebyemikono era n’amujjukiza n’eddwaaliro ly’e Mpigi lye yabasuubiza okulisuumusa okuva ku ddaala lya Health Center IV okulifuula Hospital olw’omuwendo gw’ababalwadde omunene.

Ssentebe wa NRM, Sulaiman Kaweesi yaloopedde Museveni abaali banna NRM abakukuta n’ab’oludda oluvuganya n’ekigendererwa eky’okusuula NRM mu Mpigi nga bayita mu kwesimbawo ku lwabwe.

Hajji Zziwa, omu ku bafunye mu PDM yategeezezza nti mu SSACO yaabwe bafuna obukadde 60 buli mwaka mu kulunda enkoko, emmwaanyi azifunamu obukadde 36, olusuku obukadde busatu, amata agafunamu obukadde bubiri gattako ebibala by’aggyamu 500,000/- kyokka n’amusaba abayambe ku kizibu ky’entambula, amazzi gattako eddagala ery’obuseere kubanga ekigendererwa kya SACCO yaabwe kulunda enkoko emitwalo etaano.