Ab'e Lubaga bali mu keetalo ka kukyaza Pulezidenti Museveni nga 5 Jan

Okwetegekera okukyala kwa pulezidenti Museveni e Lubaga South ku mmande nga 5 January kuli mu ggiya.
Kuwomeddwaamu omutwe ssentebe wa NRM e Lubaga Ivan Majambere Kamuntu Ssemakula, ng'ono akutte ekizindaalo kya mukalakaasa okukunga abantu okujja mu bungi ku ssomero lya Kitebi P/S ku mmande pulezidenti Museveni wagenda okukuba olukungaana okusaba akalulu k'obwa puIezidenti ekisanja ekijja, baamwanirize  mu bungi n'essanyu.

Majembere ng'akunga abawagizi ba NRM mu Lubaga okwetegekera pulezidenti Museveni

Majambere atandikidde mu basuubuzi b'akatale k'e Busega,  n'abakunga  okujja okwaniriza muzeeyi abasomere manifesto ye ejjudde  enkulaakulana gyagenda okutambuza ekisanja ekijja,  erimu okulwanirira omuntu wa wansi.
Abadde yeegattiddwaako RDC w'e Lubaga Moses Ariho era obwedda atambula bwagaba obufaananyi bwa pulezidenti Museveni eri abasuubuzi.

Majembera ng'atabbira abasuubuzi okwetegekera Pulezidenti Museveni e Busega

Majambere alayidde naawaga nti ku mulundi guno, Museveni alina okuwangula Lubaga wamu n'abakwatidde NRM bendera bonna.
Abasuubuzi bamwanirizza mu ssanyu nebamusuubiza okubeera wamu naye n'kugenda mu bungi ku ssomero lya Kitebi P/S ku mmande okwaniriza pulezidenti mu ssanyu.

Mmajembere ng'ayita mu basuubuzi

Oluvannyuma  Majambere asisinkanye abagoba ba takisi mu Lubaga nga bakulembeddwaamu ssentebe waabwe Charles Ssentongo, naabasaba okukolera awamu , naabayita okwaniriza pulezidenti Museveni ku mmande era nabo nebamusuubiza okubaayo mu bungi.

Majembere ng'ali n'asisinkanye abasuubuzi

Pulezidenti Museveni agenda kubeera ku ssomero lya Kitebi P/S ku mmande ya wiiki ejja nga January 5, 2026 gyagenda okukunga ba nna Lubaga South okumuyiira akalulu k'obwa pulezidenti ekisanja ekiddako.
Mu kiseera kino essomero n'ekisaawe biri mu kuyoyootebwa  wamu n'okuzimba ebiyitirirwa okumwetegekera.