Omukazi agambibwa okufumita bba ekiso n'amuleka ng'ataawa poliisi emuyigga!

Poliisi eyigga omukazi agambibwa okufumita bba ekiso, n'amuleka ng'ataawa, n'abulawo.

Bibadde Busega mu munisipaali y'e Rubaga mu Kampala, omusajja ow'emyaka 29 ng'akola gwa kitunzi mu kkampuni ya Double Q  Sinotruk, bw'afumitiddwa ebiso ku mutwe ne bamuleka mu kitaba ky'omusaayi.

Kigambibwa nti bano bombi, bamaze emyaka 2 mu bufumbo nga balina n'omwana ow'emyezi Omwenda nga naye, omukazi yamusuddewo nga Jan 1 n'abulawo.

Omwogezi wa poliisi mu Kampala, Racheal Kawala, agambye nti omukazi ono, ategeerekeseeko erya Joy , mu kiseera kino, yadduse era bamuyigga.

Ayongeddeko nti omusajja, atwaliddwa mu ddwaaliro e Rubaga , gy'ali mu kufunira obujjanjabi, ng'okunoonyereza bwe kugenda mu maaso.