Sinotruck eremeredde ddereeva waayo n'esaabala abakozi ababadde bakedde okugenda okukola, n’ettako 2, abalala ne baddusibwa mu ddwaaliro nga biwalattaka

LOOLE Magulukkumi eremeredde omugoba waayo n’etomera abakozi ababadde bakedde nga bagenda okukola mu kyuma ky’emitayimbwa n’ebatta

Bano ebalumbye ku mabbali g’oluguudo kwe babadde batambulira nga bali mu kibinja kyokka abasinga bwe bagirabye badduse ne balinnya ekifunvu abasigadde emabega n’ebasaabala okukkakkana ng’ababiri ebasse abalala ne bafuna ebisago.

Akabenje kano kaaguddewo leero kumakya abakozi abakolera mu kyuma ky’e Mitayimbwa ekKya Tembo Steel Works e Kitega okumpi n’ekibuga Lugazi ku Luguudo oluva e Kampala okulga e Jinja bwe babadde bakedde okugenda okukola.

Abafudde kubaddeko omuwala Apaso Patricia n’omulala abadde tannategeerekeka ate munnaabwe omulala Tereeza Amalu ye n’emugoya nnyo okubadde okumumenya emikono n’amagulu.

Bakozi bannaabwe ababadde batambula nabo bagambye nti enkuba ebadde etonnyerera bawulidde ekimotoka nga kijja nnyo ne babuna emiwabo bagenze okudda nga abalala bannaabwe bali mu luguudo nga motoka ebatomedde omulala emusogonyodde yenna.

Poliisi eyitiddwa n’eggyawo abalumiziddwa ne babatwaala mu ddwaaliro e Kawolo era n’emirambo ne gitwalibwa mu ggwanika ly’eddwaliro e Kawolo