Abayizi bannayuganda batadde abakulembeze ba Afrika ku nninga ku by’okutulugunya abaana
ABAYIZI basatu bannayuganda batadde bapulezidenti n’abakulembeze bonna mu Africa ku nninga, okukomya ebikolwa ebityoboola n’okutulugunya abaana naddala mu masomero agakyalemedde ku kukuba abayizi kibooko n’okubawa ebibonerezo ebikakali
Abayizi nga bali mu lukiiko olwabadde ku mutimbagano
ABAYIZI basatu bannayuganda batadde bapulezidenti n’abakulembeze bonna mu Africa ku nninga, okukomya ebikolwa ebityoboola n’okutulugunya abaana naddala mu masomero agakyalemedde ku kukuba abayizi kibooko n’okubawa ebibonerezo ebikakali.
Abayizi ba PEAS Horizon School nga basoma
Ng’oggyeeko abayizi bannayuganda, waabaddewo n’abalala bangi okuva mu mawanga ga Africa agenjawulo.
Comfort Ikaidu 16, eyayogedde ku lwa banne yattottoledde abakulembeze ebizibu abaana mu Uganda bye bayitamu ku masomero ne ku byalo gye babeera nga bino kuliko; okukubwa emiggo, okuweebwa ebibonerezo ebikakali, okujoogebwa baana bannaabwe, okusosolebwa, okukabasanyizibwa n’okuvumibwa nga bali ku yintanenti.
Kyokka nga bangi batya okuloopa abo ababatulugunya. Yasabye gavumenti ezenjawulo okufaayo ennyo ku baana okulaba nga bakuumibwa bulungi.
Omulanga guno we gujjidde nga waakayita ennaku ntono bukya kkooti enkulu ewera ebibonerezo ebikakali eri abaana.
Abayizi ba PEAS Horizon School nga basoma
Nga July 14, 2026, omulamuzi Simon Peter Kinobe yasingisa Sir Apollo Kaggwa Primary School omusango, abasomesa babiri bwe bakkakkana ku muyizi ne bamukuba bubi nnyo. Era okwo omulamuzi Kinobe kwe yasinzidde okuwera okukuba abayizi n’okubawa ebibonerezo ekikakali nti bimenya mateeka.
Ye Lawrence Kiggundu, akulira St. Pauline High School, Mityana, agamba nti okukuumira abaana mu mbeera ennungi nga tebatulugunyizibwa buvunaanyizibwa bwa buli ssomero, abazadde n’abantu bassekinnoomu.
"Amasomero mangi gakyatulugunya abaana yadde nga waliwo amateeka agabakugira,” bw’agamba.
Maureen Kizito, akulira okukuuma abaana mu kitongole kya PEAS Uganda, yasabye abazadde n’abo abalabirira abaana okubalera obulungi nga bwe babannyikiza eddembe lyabwe basobole okuloopanga abo bonna ababatulugunya.