Abalimi bakubiriziddwa okwettanira tekinologiya okulwanyisa embeera y'obudde

Abamu ku baabadde mu mwoleso gw'okufukirira nga bekkaanya tekinologiya omupya aleeteddwa

Bweyabadde ku mukolo gw’okwolesa obuyiiya ne tekinologiya ali mu nkola y’okufukiriran ogumanyiddwa nga Green Drops Summit and Expo ogw’omulundi ogw’okubiri ogubadde ku Mestil Hotel mu Kampala, Tumuhire yagambye nti mu kawefube wa Gavumenti ow’okuyambako abalimi okwettanira enkola ey’okufukirira, yaleeta enkola emanyiddwa nga UECCC mweyakwataganira ne kampuni ez’obwanakyewa okusobozesa abalimi okufuna ebyuma ebifukirira ebirime byabwe.
Ono yagambye nti ensi yonna erina ekizibu ky’enkyukakyuka mu mbeera y’obudde efuuse kizibu kyokka ate abantu nga balina okufuna emmere gyebalina okulya kale ng’okufukirira kyekintu ekirina okutaasa Bannayuga nga ye nsonga lwaki Gavumenti yaleeta enkola eno.

Javan Mukundane (ku kkono) nga bali mu lukungaana lw'ebyokufukirira

Yasabye abalimi okwettanira enkola eno bagende ku disitulikiti basisinkane abalimisa bamanye ekyetagisa okusobola okufuna obuweereza buno.
Akulira Sprinktech Javan Mukundane nga bebamu abakolagana ne Gavumenti mu nkola ya UECCC okutuusa ebyuma eby’omulembe   eri abalimi yagambye nti kati eggwanga werituuse mu nsonga z’okufukirira, omulimi asobola bulungi okukozesa essimu ye n’ateekako ebyuma ebifukirira ennimiro nebwaba nga taliiyo.
Ono yayongeddeko nti waliwo n’enkola ezireeteddwa, ng’omulimi takyalina kugula byuma ebifukirira byonna wabula ng’obaako enkola gy’oyitamu omukugu n’aleeta ebyuma ebifukirira n’afukirira ennimiro yo olwo n’osasula obuweereza obwo bw’aba akuwadde.

Abamu ku beetabye mu mwoleso nga bannyonnyolwa ku tekinologiya omupya mu by'okufukirira

Eng. Dominic Banaga Mucunguzi okuva mu ministula y’amazzi n’obutonde bw’ensi yakubirizza abantu okufuba okulembeka amazzi naddala ag’enkuba naddala mu kiseera nga kati ng’etandise okutonnya nga gano basobola okugeeyambisa okufukirira ebirime byabwe mu kiseera eky’ekyeya nebasigala nga bafunye amakungula amalungi