Eno gye nkola essaawa yonna banzita - ali ku kyeyo e Saudi Arabia alaajanye

Bya Moses Lemisa

Munnayuganda eyagenda okukuba ekyeyo aweerezza  abaffamire ye obubaka nga bakamaabe bwe baamusibira awaka , tebamuwa mmere, essimu gy’awuliziganyako n’abantu be agikweka mu mbugo.

Mariam Nalwadda 25  yatwalibwa kkampuni ya Al Quarshee Co Ltd  mu July w’omwaka guno ng’abaffamire bagamba n’okugenda kwe  baakutegeera  kikeerezi.

Bagamba nti ekisinga okwewuunyisa amannya g’abazadde be gaakyusibwa agali ku mpapula ze si matuufu.

Nalwadda  yasindikidde abaffamire amaloboozi ng’abasiibula nti essaawa yonna  bayinza obutaddamu kumuwuliza  olw’embeera bakama be gye bamuyisaamu.

Martha Nalwadda ssenga  we yategeezezza nti  abazadde eby’okugenda kw’omwana baabitegeera amaze kutuuka e Saudi Arabia  ng’okusinziira ku butambi bwabaweereza obulaga nti  obulamu bwe buli mu matigga kuba bakama be bamutulugunya .

Nalwadda mu maloboozi ge yaweerezza yagambye nti amaka mwe yasooka okukola  abaana b’awaka baamukubanga ssaako n’okumumma emmere ne  yeekubira enduulu ne bamuzzaayo ku ofiisi ng’eno ate eyali mukama we mu kusooka gye yamunona n’amutunda  awalala  ng’eno yasanzeeyo eby’okukola bye baamuteereddeko obukwakkulizo .

 “Ssenga temugenda kuddamu kumpuliza kuba essimu ngikweka mu mbugo naye singa banaakizuula bagenda kuginzigyako, essaawa yonna muyinza okufuna amawulire nti banzisse kuba bano omutima gwe balina gwa kitemu nejjusa ekyantwala,” Nalwadda bwe yalaajanye mu maloboozi ge yaweerezza.

Kuzayiru Mutebi, maneja wa kkampuni ya  Al Quarshee Co Ltd  yategeezezza Bukedde ku ssimu nti ensonga ya Nalwadda bagimanyiiko era baamaze okugyaayo mu maka gy’abadde atulugunyizibwa, yagasseeko nti okusinziira ku bafamire baagala akomezebwewo kye bagenda okwekeneenya balabe.