Miss Uganda Karema Tumukunde agudde mu bintu ; afunye sikaala okweyongerayo okusoma

Miss Uganda Karema Tumukunde agudde mu bintu oluvannyuma lwa yunivaasite ya tekinologiya eya  ISBAT okumuwa sikaala okusomera obwereere kkoosi yonna gy’ayagala, ate banne abalala 4 abaamuddirira, nabo ne baweebwa sikaala ez’ekitundu okusoma kkoosi ze baagala. 

Polof. Kattampackal Ng'akwasa Karema Tumukunde Ebbaluwa Emukkiriza Okusomera Obwereere Ku Isbat

Bano beeyanjudde ku yunivasite eggulo ku Lwokusatu wamu n'abayizi abapya abaakeegatta ku  ISBAT okubayisa mu birina okugobererwa nga bali ku yunivaasite eno (orientation).

Baayaniriziddwa Vice Chancellor, Polof. Mathew Kattampackal, Dr Kumar Pradeep ddayirekita w’ebyenjigiriza, Dr. Paul Giju Academic Registrar, Dr. Tom Nsubuga akulira okunoonyereza ne projects ku ISBAT, n'akulira kkampuni y'essimu eya Airtel Manoj Murali. 

Aba Yunivaasite, Atwala Miss Uganda Nannyonjo(owookutaano Okuva Ku Kkono) N'abwala Abaawangudde Sikaala.

Miss Uganda Karema ne banne okuli; Whitney Martha Ademun (first runner-up), Premah Proscy Agwanga (2^nd Runner-up), Jerusha Muwanguzi (finalist) ne Jessica Sserwadda (finalist),   baabadde bawerekeddwaako akulira okutegeka empaka za Miss Uganda Brenda Nanyonjo.

Ono yasiimye ISBAT olw'okuyamba omwana omuwala, n’ategeeza nti sikaala zino zigenda kubayamba okwongera emisomo gyabwe mu maaso, nti era mukisa gwa maanyi abawala bano gwe bafunye okusomerako mu yunivasite ey'amaanyi mu ggwanga mu bya tekinologiya.

Miss Uganda Karema Ng'ayogera.

Tumukunde yategeezezza nti afunye omukisa gwa maanyi kubanga abadde yaakatuula siniya ey'omukaaga era asiimye aba ISBAT n’ategeeza nti mu kiseera kino akyetegekera mpaka za miss world ez'okubeera e Dubai.

Yagambye nti olunaazimaliriza waakutuula wansi alonde koosi gy’ayagala okukola olwo atandike okusoma ku ISBAT.

Abamu Ku Beetaba Mu Mpaka Za Miss Uganda Abagenda Okusomera Obwereere Ku Yunivaasite Eno.

Polof. Mathew Kattampackal, amyuka ccansala wa ISBAT yagambye nti ebimu ku bigendererwa byabwe kwe kulaba nga basomesa omuntu ajjuddde, ne bamuwa obusobozi okuvuganya mu nsi y'emirimu n'okutondawo egyabwe, naddala abavubuka abawala n'abalenzi.